अर्धनग्न अन् चेहरा जळालेल्या अवस्थेत आढळला तरुणीचा मृतदेह; गोंदियात खळबळ

महादेव पहाडीवर अर्धनग्न अवस्थेत आणि जळालेल्या स्थितीत तरुणीचा मृतदेह आढळल्यानंतर परिसरात खळबळ उडाली आहे.

ठळक मुद्देकुंभारटोली जंगल परिसरातील घटना

आमगाव (गोंदिया) : तालुक्यातील कुंभारटोली पाऊडदौना मार्गावरील महादेव पहाडी जंगल परिसरात एका १५ ते १७ वर्षीय मुलीचा अर्धनग्न जळालेल्या अवस्थेत मृतदेह आढळून आला. तरुणीवर अत्याचार व नंतर हत्या करून ओळख पटू नये म्हणून आरोपींनी चेहरा जाळण्याचा प्रयत्न केल्याचा कयास लावला जात आहे. ही घटना गुरुवारी (दि. २१) सकाळी उघडकीस आली.

आमगाव शहराला लागून असलेल्या कुंभारटोली पाऊडदौना रोडवरील महादेव पहाडी परिसर जंगलाने व्यापलेला आहे. दररोज सकाळी गावातील नागरिक मॉर्निंग वॉक करण्यासाठी तर काही लोक कुडव्याची फुले तोडण्यासाठी, सरपण गोळा करण्यासाठी येथे येतात. नेहमीप्रमाणे गुरुवारी सकाळी कुंभारटोली गावातील काही लोक जंगल परिसरात सरपण गोळा करण्यासाठी गेले असताना गावकऱ्यांना एका तरुणीचा अर्धनग्न मृतदेह आढळला. याची माहिती त्यांनी लगेच आमगाव पोलिसांना दिली.

माहिती मिळताच उपविभागीय पोलीस अधिकारी, पोलीस निरीक्षक घटनास्थळी दाखल झाले. पंचनामा करून मृतदेह उत्तरीय तपासणीसाठी आमगाव येथील ग्रामीण रुग्णालयात पाठविण्यात आला. ही घटना मध्यरात्रीच्या सुमारास घडली असावी, असा अंदाज लावला जात आहे. या तरुणीवर अत्याचार करून नंतर हत्या करण्यात आली असावी व ओळख पटू नये म्हणून तोंडावर दुपट्टा टाकून मृतदेह जाळण्याचा प्रयत्न केल्याचा अंदाज घटनास्थळावरील स्थितीवरून लावला जात आहे. या घटनेचा तपास आमगाव पोलीस करीत आहेत.

श्वान पथकाला केले पाचारण

महादेव पहाडीवर अर्धनग्न अवस्थेत आणि जळालेल्या स्थितीत तरुणीचा मृतदेह आढळल्यानंतर परिसरात खळबळ उडाली आहे. तरुणीचा चेहरा जळालेला असल्याने तिची ओळख पटविणे कठीण जात आहे. त्यामुळे या प्रकरणातील आरोपींचा शोध घेण्यासाठी पोलिसांनी श्वान पथकाला पाचारण केले होते.

तरुणीची ओळख पटविण्याचे आव्हान

तरुणीचा चेहरा पूर्णपणे जळालेला असल्याने तिची ओळख पटविण्यासाठी पोलिसांपुढे आव्हान निर्माण झाले आहे. दरम्यान, घटना उघडकीस आल्यानंतर पोलिसांनी आपली सर्व सूत्रे हलविली असून, यातील आरोपींचा शोध घेण्यास सुरुवात केली आहे.