डोंगरगाव येथील खोड्या तलावाची दुरुस्ती करा

सडक-अर्जुनी : तालुक्यातील ग्राम डोंगरगाव-खजरी या गावच्या उत्तरेकडे असलेल्या खोड्या तलावात नाल्यातील पाणी आणल्यास तलावात पाण्याची पातळी वाढून सिंचनासाठी त्याचा फायदा होईल. याकरिता खोड्या तलावाची दुरुस्ती करण्याची मागणी नागरिक करीत आहेत.

डोंगरगावच्या वरच्या भागातून नाला वाहतो. पावसाळ्यात अनेकदा पूर येतो. या नाल्यावर मोठा बंधारा बांधल्यास बंधाऱ्याच्या माध्यमातून नाल्याचे पाणी सरळ शासकीय खोड्या तलावात येईल. पावसाळ्याची सुरुवात झाल्यानंतर तलाव पुराच्या पहिल्या पाण्याने तुडुंब भरून जाईल. या तलावात नाल्याचे पाणी आणल्यास तलावातील पाण्याची पातळी वाढेल व विहिरी आणि जमिनीच्या सिंचनासाठी लाभ होऊन पाण्याची पातळी वाढेल. याशिवाय पावसाळ्यात शेतकऱ्यांना ओलितासाठी फायदा होईल. ही अतिक्रमण शेती हटवून उंच पार करावे, त्याचप्रमाणे रपट्याची उंची वाढवण्याची गरज आहे. त्याचप्रमाणे संपूर्ण तलावाचे खोलीकरण केल्यास उन्हाळ्यात पिण्याच्या पाण्याची समस्या भासणार नाही.

ही मागणी ग्रामपंचायत व गावकऱ्यांची अनेक वर्षांपासून असून मंत्र्यांना निवेदन देऊनही मागणी अद्यापही पूर्ण झालेली नाही. आसपासच्या सर्व गावांसाठी फायद्याचा असणारा हा तलाव असल्याने खोड्या तलावाची दुरुस्ती करावी, अशी मागणी तुळशीदास चौधरी, विनायक लांजेवार, यशवंत कठाणे, नीलकंठ कठाणे, नीलकंठ कोरे, मार्कंड कोरे, भानुदास डोये, सावजी हुकरे, यादव हुकरे, तंटामुक्त समिती अध्यक्ष कुंडलिक लांजेवार, सदाराम भेंडारकर, कठाणे, अनिल कोरे, देवराव कोरे, अशोक हुकरे, पुरुषोत्तम राणे, उत्तमराव राणे,

आदींनी केली आहे.