रेमडेसिविर इंजेक्शनचा काळाबाजार करणाऱ्यांची तुरुंगात रवानगी ()

गोंदिया : कोविड रुग्णांना जीवनदान देणाऱ्या रेमडेसिविर इंजेक्शनची काळ्याबाजारात विक्री करण्यात येत होती. हे रेमडेसिविर इंजेक्शन चक्क गोंदियाच्या केटीएस जिल्हा सामान्य रुग्णालयातून काळ्याबाजारात विक्रीसाठी जात होते. या प्रकरणात स्थानिक गुन्हे शाखेने तिघांना अटक केली आहे. जिल्हा सत्र न्यायालयाने आरोपी संजू विकास बागडे, दर्पण नागेश वानखेडे, नीतेश ऊर्फ करण भीमराव चिचखेडे या तिघांना २३ एप्रिलपर्यंत पोलीस कोठडी सुनावली होती. त्यांना आता न्यायालयीन कोठडीत रवाना करण्यात आले आहे.

गोंदियात ऑक्सिजन व रेमडेसिविर इंजेक्शनअभावी कोविड रुग्णांचा मृत्यू झाला. रुग्णांचा जीव वाचविण्यासाठी आलेल्या रेमडेसिविर इंजेक्शनची काळ्याबाजारात विक्री करून मोठ्या प्रमाणात पैसा कमविण्याच्या नादात असलेल्या तिघांना स्थानिक गुन्हे शाखेच्या पोलिसांनी अटक केली. एक इंजेक्शनचे १५००० रुपयाप्रमाणे दोन इंजेक्शनचे ३० हजार रुपयात विक्री केले जात होते. त्या आरोपींनी गोंदियाच्या केटीएस जिल्हा सामान्य रुग्णालयातून हे रेमडेसिविर इंजेक्शन आणल्याचे सांगितले. या प्रकरणाचा तपास पोलीस निरीक्षक महेश बनसोडे यांच्याकडे होता. आरोपी संजू विकास बागडे, दर्पण नागेश वानखेडे, नीतेश ऊर्फ करण भीमराव चिचखेडे या तिघांविरुध्द गोंदिया शहर पोलीस ठाण्यात भादंविच्या कलम ४२०, १८८, ३४ सह परिशिष्ट २६ औषध नियंत्रण किंमत आदेश २०१३, सहकलम ३ (क), ७ जीवनावश्यक वस्तू अधिनियम १९५५, सहकलम १८ (क), २७ (ख),(दोन) औषधी व सौंदर्यप्रसाधन कायदा १९४० व नियम १९५४ अन्वये गुन्हा दाखल केला आहे. या आरोपींपैकी नीतेश ऊर्फ करण भीमराव चिचखेडे हा केटीएस जिल्हा सामान्य रूग्णालयात इसीजी टेक्निशियन असल्याचे सांगितले आहे. त्यानेच टेबलवर ठेवलेल्या दोन रेमडेसिविर इंजेक्शन उचलून नेले व त्यांची काळाबाजारात विक्री करण्यासाठी दलाल म्हणून दोघांना ठेवल्याचे त्याने पोलिसांना सांगितले. २३ एप्रिलपर्यंत पोलीस कोठडी होती. ती मुदत संपल्याने न्यायालयात हजर केले असता न्यायालयाने आरोपींना न्यायालयीन कोठडी सुनावली आहे.