शेतीतून पर्यटनाला चालना

जवळील कारंजा येथील तालुका बीज गुणन व कृषी चिकित्सालय परिसरात विकसित होत असलेल्या कृषी पर्यटन केंद्रात विविध पिकांचे प्रयोग आता प्रत्यक्षात साकारले जात आहे.

पालकमंत्र्यांची भेट : कारंजात साकारतेय केंद्र
गोंदिया : जवळील कारंजा येथील तालुका बीज गुणन व कृषी चिकित्सालय परिसरात विकसित होत असलेल्या कृषी पर्यटन केंद्रात विविध पिकांचे प्रयोग आता प्रत्यक्षात साकारले जात आहे. यातून लवकरच कृषी पर्यटनाला सुरूवात होणार आहे. पालकमंत्री राजकुमार बडोले यांनी शनिवारी या ठिकाणी भेट देवून अधिकाऱ्यांना विविध सूचना केल्या.
या केंद्रातील सेंट्रलाईज ईरीगेशन सिस्टिम, मल्चिंग व ठिंबक पद्धतीने डाळींब लागवड, शून्य मशागत ऊस लागवड, ठिंबक धान लागवड, ट्रॅक्टरद्वारे धानपेरणी, ठिंबक सिंचनावर आधारित उन्हाळी धान लागवड, दीड कोटी लिटर क्षमतेच्या शेततळ्याच्या माध्यमातून संरक्षित सिंचन, मोगराबांध पद्धतीतून मत्स्यबीज उत्पादन, भाताच्या बांधीत सिंगाडा शेती, ठिंबक सिंचनाच्या माध्यमातून एक डोळा पद्धतीने ऊस लागवड आणि नायलॉन जाळीद्वारे शेतातील पिकाचे संरक्षण आदिची पाहणी पालकमंत्र्यांनी यावेळी केली.
अशा प्रकारच्या शेती करण्याच्या पद्धतीतून कृषी पर्यटनाला चालना मिळेल तसेच अनेक शेतकरी या केंद्राच्या प्रेरणेतून आधुनिक शेतीकडे वळतील, असा विश्वास पालकमंत्र्यांनी यावेळी व्यक्त केला. विकसित होत असलेल्या कृषी पर्यटन केंद्राबाबतची माहिती पालकमंत्र्यांना जिल्हा अधीक्षक कृषी अधिकारी अशोक कुरील यांनी दिली. पालकमंत्र्यांसोबत आ. विजय रहांगडाले, भाजपा जिल्हाध्यक्ष विनोद अग्रवाल उपस्थित होते.
यावेळी उपविभागीय कृषी अधिकारी नाईकवाड, कृषी पणन तज्ञ श्ािंदे, कृषी पर्यवेक्षक पटले, कृषी उपसंचालक भोपळे, उपप्रकल्प व्यवस्थापक फाडके, कृषी तंत्रज्ञ व व्यवस्थापक राहूल सेंगर, पद्माकर गिदमारे, उपवंशी व बिसेन यांची उपस्थिती होती. (जिल्हा प्रतिनिधी)