घरी आईचं पार्थिव अन् १७ वर्षाच्या शालिनीने दिला बारावीचा पेपर; शिक्षणासाठीच्या जिद्दीला सलाम

आईचं स्वप्न पूर्ण करण्यासाठी ८ किलोमीटर अंतर पार करून पोहोचली परीक्षा केंद्रात

दिलीप चव्हाण, गोरेगाव (गोंदिया): घरात आक्रोश, शोककळा पसरलेली, मनात आईच्या आठवणींचा असह्य वेदनादायी पूर... अशा हृदय पिळवटून टाकणाऱ्या प्रसंगातही एका १७ वर्षीय मुलीने शिक्षणासाठी दाखवलेली जिद्द पाहून संपूर्ण परिसर स्तब्ध झाला. तिने चक्क आईच्या अंत्यसंस्काराच्या वेळेवर बारावीचा अर्थशास्त्राचा पेपर दिला. मनाला चटका लावणाऱ्या प्रसंगातही मुलीने आईचे स्वप्न पूर्ण करण्यासाठी शिक्षणासाठी दाखवलेली जिद्द प्रेरणादायी आहे. गोरेगाव तालुक्यातील तुमखेडा येथील शालिनी छन्नुलाल पोंगळे असे त्या विद्यार्थिनीचे नाव आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा

शालिनी पोंगळे ही गोरेगाव शहरातील पी. डी. रहांगडाले विद्यालयातील बारावीची कला शाखेची विद्यार्थिनी. मंगळवारी (दि. २४) शालिनीचा अर्थशास्त्र विषयाचा पेपर होता. पण पेपरच्या आदल्या दिवशीच साेमवारी (दि. २३) रात्री ८ वाजता शालिनीची आई बबिता पोंगळे यांचा गोंदियातील शासकीय रुग्णालयात उपचारादरम्यान दुर्दैवी मृत्यू झाला. यामुळे शालिनीसह पोंगळे कुटुंबावर शोककळा पसरली. कुटुंबात राहणाऱ्या तिघीच आजी, आई आणि शालिनी. आधीच घरात अठरा विश्व दारिद्र्य आणि त्यात आईचा ३८व्या वर्षी मृत्यूने शालिनीवर मोठे संकट कोसळले. या सर्व दुःखद घटनेची माहिती शालिनीने पी.डी. रहांगडाले विद्यालयाचे प्राचार्य सी. डी. मोरघडे व वर्गशिक्षक डी. एम. राठोड यांना दूरध्वनीवरून दिली. आईचे अंत्यसंस्कार करायचे आहेत, मी आज पेपर देऊ शकत नाही. शालिनीचे हे शब्द ऐकताच प्राचार्य सी. डी. मोरघडे यांनी आपल्या शिक्षकासह शालिनीचे घर गाठले. तिची समजूत काढली व शालिनीला पेपर देण्यासाठी स्वतः परीक्षा केंद्रावर घेऊन आले. दीड तासाच्या आत पेपर सोडवून झाल्यावर शालिनीला पुन्हा शिक्षकांनी तिच्या घरी सोडून दिले.

आठ किमी अंतर पार करीत पोहोचली शालिनी परीक्षा केंद्रावर

गोरेगाव ते तुमखेडा आठ किमीचा प्रवास करीत शालिनी वेळेत परीक्षा केंद्रावर पोहोचली. डोळ्यात अश्रू होते; पण मनात आईची प्रेरणा. तिने अर्थशास्त्राचा पेपर शांतपणे सोडविला. तिच्यासाठी हा केवळ एक विषय नव्हता, तर आयुष्याच्या कठीण प्रसंगावर मात करण्याची पहिली पायरी होती. शालिनीची ही जिद्द अनेकांना प्रेरणा देणारी ठरली आहे. दुःख कितीही मोठं असलं, तरी स्वप्न आणि शिक्षणाची ज्योत विझू देत नाही याचे जिवंत उदाहरण शालिनीने दिले.

परीक्षा केंद्रावर भावनिक वातावरण

शालिनी पोंगळे ही बारावीची विद्यार्थिनी पी. डी. रंहागडाले विद्यालयातील परीक्षा केंद्रावर वर्गशिक्षक डी.एम. राठोड यांच्यासोबत पोहोचली. प्राचार्य सी. डी. मोरघडे व बारावी परीक्षा केंद्राचे केंद्रसंचालक डी.बी. चाटे यांनी तिला धीर दिला. डोळ्यात सतत अश्रू असतानाही शालिनीने ध्येयाने अर्थशास्त्राचा पेपर सोडविला. यावेळी परीक्षा केंद्रावर भावनिक वातावरण निर्माण झाले होते.

अंत्यसंस्कारासाठी शालिनीला आर्थिक मदत

२३ फेब्रुवारीला सायंकाळी ८ वाजताच्या सुमारास शालिनीची आई बबिता पोंगळे हिचा उपचारादरम्यान शासकीय रुग्णालयात दुर्दैवी मृत्यू झाला. या घटनेची माहिती मिळताच गोरेगाव पंचायत समितीचे माजी सभापती मनोज बोपचे यांनी पी.डी. रंहागडाले विद्यालय गाठून शालिनीला पाच हजार रुपयांची आर्थिक मदत दिली, तर प्राचार्य सी. डी. मोरघडे यांनी शाळेकडून शालिनीच्या कुटुंबाला आर्थिक मदत करीत शालिनीला धीर दिला.