नवोपक्रमामुळे करटी केंद्र प्रकाशझोतात

तिरोडा पंचायत समितीअंतर्गत येणाऱ्या करटी (बु.) केंद्राच्या विविध नाविण्यपूर्ण उपक्रमांमुळे या केंद्रांतर्गत जिल्हा

प्रगतीकडे वाटचाल : केंद्रप्रमुख, विषयशिक्षक घेताहेत मेहनत
हुपराज जमईवार ल्ल परसवाडा
तिरोडा पंचायत समितीअंतर्गत येणाऱ्या करटी (बु.) केंद्राच्या विविध नाविण्यपूर्ण उपक्रमांमुळे या केंद्रांतर्गत जिल्हा परिषदेच्या शाळांचा शैक्षणिक दर्जा वाढत आहे. केंद्रप्रमुख आर.बी. घोष यांच्या नवोपक्रमशिल कल्पनांनी प्रगत शैक्षणिक महाराष्ट्रकडे केंद्राची वाटचाल सुरू आहे.
करटी बु. केंद्रांतर्गत उच्च प्राथमिक शाळा ६ व प्राथमिक ४ मिळून एकूण १० शाळा आहेत. शैक्षणिक सत्र २०१६-१७ मध्ये संपूर्ण करटी बु. केंद्र १०० टक्के प्रगत करण्याच्या अनुषंगाने त्यांनी २५ निकषांच्या अनुषंगाने केंद्रस्तरीय विषय शिक्षकांचे पथक तयार केले. या पथकामध्ये नवनियुक्त विषय शिक्षक जयंत डहाटे (बेरडीपार), दिलीप हिरापुरे (बिहिरीया), लच्छू ढबाले (बिहीरीया), संतोष ठाकरे (डब्बेटोला), डब्ल्यू. व्ही. न्यायकरे (पालडोंगरी), विजय भगत (जमुनिया), कविता चिंचमलातपुरे (इंदोरा बु.) यांचा समावेश करण्यात आला. पथकाने प्रगत शैक्षणिक महाराष्ट्रअंतर्गत २५ निकषांच्या अनुषंगाने प्रश्नपत्रिका केंद्रप्रमुख घोष यांच्या मार्गदर्शनाखाली तयार केली. पथकामार्फत केंद्रांतर्गत सर्व १० शाळांचे मुल्यांकन केले. हे मुल्यांकन वस्तुनिष्ठ करण्यात आले. शाळा तपासणीमध्ये केंद्रप्रमुख घोष यांनी स्वत: प्रत्यक्ष सहभाग घेतला. शिक्षण परिषदेमध्ये शाळांमध्ये असलेल्या उणिवा व त्रुटी यावर पथकामार्फत मार्गदर्शन करण्यात आले.
सर्व बाबींची दखल घेत तिरोडाचे गटशिक्षणाधिकारी सुनील मांढरे यांनी सर्व केंद्र प्रमुखांना उपक्रम राबविण्यासाठी सूचनाही दिल्या आणि हळूहळू जिल्हास्तरावर या उपक्रमाची दखल घेतली जात आहे.
केंद्रांतर्गत सर्व शिक्षकांनी गुणवत्तेचा ध्यास घेत वर्गनिहाय प्रश्नपत्रिका काढून व विविध नवोपक्रम राबवून आपला वर्ग व शाळा प्रगत करण्याचा ध्यास घेतला. पालकवर्गातूनही याकरिता सहभाग मिळत आहे.

असे राबविले जाताहेत उपक्रम
४केंद्रप्रमुख आर.बी. घोष यांच्या प्रेरणेतून केंद्रांतर्गत येणाऱ्या शाळांचे मुख्याध्यापक व शिक्षकांनी २५ निकषांनुसार पुस्तकाचे वाचन करुन प्रत्यक्ष अध्यापन प्रक्रिया अधिक चांगली, परिणामकारक केली. या केंद्रांतर्गत येणाऱ्या दहाही शाळांमध्ये ‘सुंदर मी होणार, दिनांकानुसार इंग्रजी शब्दार्थ, माझा वाढदिवस, स्वच्छ शाळा-सुंदर शाळा, नमस्कार घालणे, गणितीय खेळ, दिनांकानुसार पाढा, कानाने ऐकूया-पेनाने लिहू या, चला नाटक करुया, चिठ्ठी उचलून बोलूया, बालसभेचे आयोजन, कौन बनेगा ज्ञानपती’ असे विविध नवोपक्रम सुरू केले. ३१ डिसेंबर २०१६ पर्यंत संपूर्ण केंद्र प्रगत घोषित करण्याचा संकल्प केंद्रप्रमुखांसह सर्व मुख्याध्यापक व शिक्षकांनी घेतला.