कमी टक्क्यांत कर्जाचा मॅसेज आला तर ॲप डाऊनलोड करू नका!

गोंदिया : सगळेकडे पैशाची चणचण असल्याने दुष्काळात तेरावा महिना म्हणून कर्ज देण्याच्या नावावर लुटणारी टोळी सक्रिय झाली आहे. आपल्याला इतक्या रकमेचे कर्ज मंजूर झाले आहे. त्या कर्जासाठी तुम्ही पात्र ठरले आहात असे सांगणारे मॅसेज किंवा कॉल आला तर त्यांच्या भूलथापांना बळी पडू नका. कारण हा कॉल करणारे लोक फसवणूक करणाऱ्या टोळीतील लोक आहेत. ते आपल्याला कर्ज देण्याच्या नावावर लाखोचा गंडा करण्याची शक्यता नाकारता येत नाही.

कर्जासाठी थोडी कार्यवाही केली की थेट तुमच्या खात्यात कर्ज असे सांगून लोकांची फसवणूक केली जाते. एखाद्या व्यक्तीने कर्जाची गरज आहे असे सांगितल्यावर त्या व्यक्तीला ते लोक हळूहळू त्यांच्याशी जवळीक साधून त्यांना गंडवितात. सुरुवातीला काही माहिती हवी आहे असे सांगून जवळीक साधतात त्यानंंतर त्यांची वैयक्तिक माहिती घेऊन त्यांना आपल्या जाळ्यात अडकवितात. त्या मॅसेजमध्ये एक लिंक असते त्या लिंकला ओपन करून नका अन्यथा आपल्या खात्यातील पैसे गायब होतील.

......................................

ही घ्या काळजी

१) कर्ज घेण्यासाठी मोबाईल ॲपचा वार करू नका अन्यथा आपली फसवणूक होऊ शकते.

२) आपल्याकडून घेण्यात येणाऱ्या वैयक्तिक माहितीचा गैरवापरदेखील होऊ शकतो.

३) कर्ज देणारी बॅंक कर्ज देण्यासाठी संपूर्ण प्रक्रिया केल्यावरच कर्ज देते अन्यथा देत नाही याकडे लक्ष द्यावे.

.....................

ॲप डाऊनलोड करताच बॅंकेच्या खात्यातील रक्कम गायब

१) आपल्याला कर्ज मंजूर झाले ते कर्ज उचण्यासाठी आपल्याला ॲप डाऊनलोड करावा लागेल असे सांगितले जाते. ते ॲप डाऊनलोड करणाऱ्याच्या खात्यातील संपूर्ण रक्कम गायब होत आहे.

२) आपल्या खात्यात पैसेच नाहीत तर आपली फसवणूक कशी करणार असे आपल्याला वाटत असेल तर ते साफ चुकीचे आहे. ते फसवणूक करणारे लोक इतरांकडून फसवणूक केलेला पैसा आपल्या खात्यात ठेवू शकतात, यासाठी सजग रहा.

३) कायद्याच्या चौकटीत राहून सर्वांना आपापली कामे करायची असतात. परंतु अटी आणि शर्तीचे पालन न करणाऱ्यांना कायद्याचा धाक दाखवून त्यांना लुटले जाऊ शकते.

..........................

असे तुम्हीही फसू शकता

केस १) गोंदियातील एका गृहस्थाच्या फोनवर मॅसेज आला. त्यांना पैशाचीही गरज होती. प्लाॅट घेण्यासाठी पैसे कमी पडत असल्याने आपल्याला सहज कुणी कर्ज देईल तर बरे होईल अशी त्यांची मनीषा होती. तशाच परिस्थीतीत आलेल्या मॅसेजच्या आमिषाला ते बळी पडले आणि त्यांचे पैसे काढण्यात आले.

....

केस २) एका महिलेला गृहउद्योगासाठी ५० हजार रुपयांचे कर्ज हवे होते. परंतु कर्ज घेण्यापेक्षा पैशाची जुळवाजुळव करू अशी त्यांची धारणा होती. तर दुसरीकडे आपला गृहउद्योग लवकर सुरू झाला तर आपल्याला पैसे लवकर येतील यासाठी कर्ज घेऊन व्यवसाय सुरू करू असे वाटत होते. त्यांना कर्ज देण्याच्या नावावर आलेल्या मॅसेजला वाचल्यावर लिंक उघडली असता त्या मॅसेसाठी त्यांना फाॅलोअप घेणारे कॉल आले आणि त्यांची दहा हजाराने फसवणूक झाली.

......................

या आमिषाला बळी पडू नका

-कर्ज घेण्यासाठी कागदोपत्री कार्यवाही करावी लागते. परंतु कागदपत्रे न मागताच सहजरीत्या कर्ज देण्याचे कुणी आमिष देत असेल तर आपल्याला वेळीच सावध होणे आवश्यक आहे.

- पॅन कार्ड, आधार कार्ड द्या कर्ज देतो कुणी म्हणत असेल तर ते सपशेल खोटे आहे. कुठल्याही गॅरंटीशिवाय आपल्याला कर्ज कुणी देणार नाही.

- कमी व्याजदराच्या आमिषात अडकवून चक्रवाढीने व्याज वसूल केला जात असल्याच्या तक्रारी पुढे येत आहेत.

................

कर्जाची गरज जरी असली तरी कुणीही प्रत्येक बॅंक किंवा संस्थेशी थेट संपर्क केल्याशिवाय कुठलीही लिंक ओपन करू नये, आपली फसवणूक तर होणार नाही, हा भाव आधी मनात आणावा. त्यानंतरच पुढचे काम करावे. बॅंकेच्या अधिकाऱ्यांना भेटावे. आपण आमिषाला बळी पडले की आपले नुकसान होईल.

- तेजस्विनी कदम, सायबर सेल प्रमुख