खोडशिवनी येथील कन्टेटमेंट झोन उठविण्याची मागणी ()

गावातील वृद्ध व्यक्तीचे नैसर्गिक मृत्यू होण्याच्या प्रमाणात अचानक वाढ झाल्यामुळे आरोग्य विभागातर्फे कोरोना चाचणी करण्यात आली. त्यामुळे एप्रिल महिन्याच्या तिसऱ्या आठवड्यात गावात ४४ रुग्ण कोरोना पॉझिटिव्ह आढळून आले. त्यामुळे तहसीलदार व खंडविकास अधिकारी यांनी गावाला भेट दिली व लोकसंख्येच्या प्रमाणात आणखी काही रुग्ण वाढू शकतात, याची शंका आल्यामुळे गाव २४ एप्रिलला कंटेन्मेंट झोन म्हणून घोषित करण्यात आले. त्यामुळे त्याचदिवशी ग्रामीण सचिवालय येथे आपत्कालीन ग्राम समितीची सभा घेण्यात आली. त्यामध्ये सरपंच उर्मिला कंगाले, पोलीसपाटील भृंगराज परशुरामकर, उपसरपंच टेकराम परशुरामकर, ग्रामसेवक ओंकार कापगते, तलाठी ओ. डी. भुरे, आरोग्य सेविका न्याहामूर्ते, अंगणवाडी सेविका योगीता भरडे व खोब्रागडे आदीचा समावेश होता. समितीने तातडीने करावयाच्या उपाययोजनांवर चर्चा केली. जर कोरोना प्रादुर्भाव वाढताच, तर विलगीकरणासाठी एक शाळा तयार करण्यात आली. गावात कीटकनाशक औषधाची फवारणी करण्यात आली. सर्व गावकऱ्यांना कोरोना चेन तोडण्याकरिता समुपदेशक करण्यात आले. गावातील खासगी व्यवसाय करणारे डॉ. आर. बी. वाढई, डॉ. नामदेव परशुरामकर यांचे सहकार्य घेण्यात आले. एकंदरीत रुग्णांना औषधोपचार व विलगीकरण केलेल्या रुग्णांच्या सहकार्यामुळे खोडशिवनी येथील रुग्ण संख्येत घट होऊन तो आकडा शून्यावर आला. यानंतरही शासनाने घालून दिलेल्या दिशानिर्देशाचे पालन होत आहे. त्यामुळे येथील कन्टेटमेंट झोन उठविण्याची मागणी गावकऱ्यांनी केली आहे.