१ कोटी ३५ लाख रुपयांच्या निधीतून होणार त्या रस्त्याचे बांधकाम ()

आमगाव : कामठा रोड आमगाव ते रावणवाडी या रस्त्यावर ठिकठिकाणी खड्डे पडले होते. यामुळे मार्गावरील अपघातांच्या संख्येतही वाढ झाली होती. या समस्येकडे शासन व प्रशासनाचे लक्ष वेधण्यासाठी कामठा मार्ग संघर्ष समितीने आंदोलनही केले. अखेर रस्त्यावरील खड्डयांमध्ये लोकप्रतिनिधींचे छायाचित्र लावण्याचा इशारा दिल्यानंतर शासन आणि प्रशासनाने याची दखल घेतली आहे. या रस्ता बांधकामासाठी १ कोटी ३५ लाख रुपयांचा निधी मंजूर केला आहे.

येथील कामठा मार्ग संघर्ष समितीच्यावतीने २ ऑगस्ट रोजी रस्ता दुरुस्तीच्या मागणीला घेऊन आंदोलन छेडण्याचा इशारा दिला होता. याची दखल घेत आमदार सहषराम कोरोटे यांनी मध्यस्थी करीत रस्ता बांधकामासाठी निधी मंजूर केला आहे. आमदार कोरोटे यांनी तत्परता दाखवित २६ जुलै रोजी निंबार्ते लॉन येथे कामठा मार्ग संघर्ष समितीची बैठक घेण्यात आली. पहिल्या टप्प्यात आमगाव ते रावणवाडीपर्यंत १० लाख रुपयांच्या निधीतून त्वरित रस्त्यावरील खड्डे बुजविण्याचे निर्देश सार्वजनिक बांधकाम विभागाच्या अधिकाऱ्यांना दिले. १ कोटी ३५ लाख रुपयांच्या निधीतून या रस्त्याचे बांधकाम करण्यात येणार आहे. यामुळे कामठा मार्ग संघर्ष समितीच्या आंदोलनाचे फलित झाले आहे. रस्त्याचा प्रश्न मार्गी लावल्याबद्दल समितीचे उपाध्यक्ष राजीव फुंडे, समन्वयक कमलेश चुटे, अध्यक्ष बंटी चूटे, संजय बहेकार, मुरलीधर भूते, मोहिणी निंबार्ते, संघटक मेघश्याम मोटघारे, प्रदीप खोटेले, प्रसिद्धी प्रमुख सागर चूटे, दुर्गेश गौत्तम, जयेंद्र कोटांगले, महेंद्र फरकुंडे, रंजित टेंभुर्णेकर, हितेश शहारे, योगेश गौतम, विजय फुंडे, सुभाष चुटे, मंगल बर्वे, सुनील बिसेन, सतीश चुटे, अनुप शोमवंशी, निलेश कटरे, अजय दोनोडे, मदन चौरागडे, त्रिदेव चौधरी, महेंद्र मेंढे, हंसराज हरिणखेडे यांनी आभार मानले.