दक्षता खाते मजबूत करणार

पणजी : दक्षता खात्यासह या खात्याच्या भ्रष्टाचारविरोधी विभागासाठी सरकारने ३१ नव्या पदांची निर्मिती केली आहे. दक्षता खात्यासह यापुढे पोलिसांची स्वतंत्र तपास यंत्रणा (एसआयटी) मजबूत केली जाईल, असे मुख्यमंत्री मनोहर पर्रीकर यांनी बुधवारी येथे सांगितले. बुधवारी मंत्रिमंडळाची बैठक झाली. त्या बैठकीत दक्षता खात्यासाठी ३१ पदांची निर्मिती करण्यात आली. या ३१ पदांमध्ये सात पुनर्जीवित करण्यात आलेल्या पदांचा समावेश आहे, असे मुख्यमंत्र्यांनी स्पष्ट केले. दक्षता खात्याकडे पुरेसे मनुष्यबळ नसल्याने अनेक तक्रारींबाबत जलदगतीने चौकशी होऊ शकत नाही. अनेक प्रकरणे दीर्घकाळ तशीच राहतात. दीर्घकाळ चौकशी सुरू राहणे हा एक प्रकारे संबंधित व्यक्तीचा छळ ठरतो, असे मुख्यमंत्री म्हणाले. दोन पोलीस उपअधीक्षक, दोन निरीक्षक, एक उपसंचालक अशा प्रकारची ३१ विविध पदे यापुढे भरली जातील. अनेक पदांवर डेप्युटेशनवर अधिकारी आणले जातील. त्यांना आवश्यक प्रमाणात जागाही उपलब्ध करून दिली जाईल, असे पर्रीकर म्हणाले. दरम्यान, मंत्रिमंडळ बैठकीत बुधवारी राज्य माहिती आयुक्त नियुक्तीबाबतचा प्रस्ताव आला नाही. सरकारचे माहिती सचिव रजेवर असल्याने पुढील आठवड्यात प्रस्ताव मंत्रिमंडळासमोर येईल. मात्र, या पदांसाठी उमेदवारांच्या निवडीला संबंधित समितीने मान्यता दिली आहे, असे स्पष्ट केले. (खास प्रतिनिधी) )