'अभंग रिपोस्ट'ला उत्स्फूर्त प्रतिसाद; आरोग्यमंत्री विश्वजीत राणे यांच्या हस्ते उद्घाटन

उसगाव न्हाले भक्तिरसात

लोकमत न्यूज नेटवर्क, उसगाव : आरोग्यमंत्री विश्वजीत राणे यांच्यातर्फे टाकवाडा, उसगाव येथील मैदानावर रविवारी (दि.२९) आयोजित केलेल्या 'अभंग रिपोस्ट' कार्यक्रमाला उत्स्फूर्त असा प्रतिसाद लाभला. मंत्री राणे यांच्या हस्ते पारंपरिक पद्धतीने समई प्रज्वलित करून कार्यक्रमाचा शुभारंभकरण्यात आला.

कार्यक्रमाच्या शुभारंभी आरोग्यमंत्री विश्वजीत राणे, भाजप वाळपई मंडळ समिती अध्यक्ष रामा खरवत, उसगाव जिल्हा पंचायत सदस्य समीक्षा नाईक, उसगाव सरपंच राजेंद्र नाईक, उपसरपंच संगीता डोईफोडे, पंच रामनाथ डांगी, गोविंद परब फात्रेकर, संजय गावडे, नरेंद्र गावकर, विनोद मास्कारेन्स, विलियम मास्कारेन्स, रेश्मा मठकर, समाज कार्यकर्ते विनोद शिंदे उपस्थित होते.

कसलेच राजकारण न करता युवकांमध्ये असलेल्या ऊर्जा आध्यात्मिक मार्गाकडे वळविण्याचा हा प्रयत्न आहे. युवाशक्ती आणि आमचे विचार वेगळे आहेत. आजपासून युवापिढीत नवी वाटचालीची सुरुवात करीत आहोत. इथे अनेक राजकारणी आम्ही पाहिले, परंतु उसगावातील लोकांना संघटित करण्याचा विचार कुणीच केला नाही, असे मंत्री राणे यावेळी बोलताना म्हणाले.

यावेळी मुख्य गायक प्रतीश म्हस्के, दुष्यंत देवरुखकर (ड्रम), स्वप्निल तरपे (बास गिटार), अजय वव्हाळ (गिटार), तुषार तोतरे (हार्मोनियम), रोशन आडे (तबला), पी.सू, आचार्य, सुमित शिंदे, अभिजीत चव्हाण व इतर कलाकारांचा मंत्री राणे यांच्या हस्ते गौरव करण्यात आला. स्वागत समीक्षा नाईक यांनी केले. प्रास्ताविक सरपंच राजेंद्र नाईक यांनी केले.

सूत्रसंचालन सिद्धी उपाध्ये यांनी केले, तर रामनाथ डांगी यांनी आभार मानले. कार्यक्रम यशस्वी करण्यासाठी वाळपई भाजप मंडळाचे माजी अध्यक्ष रामनाथ डांगी, माजी जिल्हा पंचायत सदस्य तुळशीदास प्रभू, माजी पंच दिनेश तारी, उसगावचे पंच सदस्य विनोद मास्कारेन्हस, लक्ष्मीकांत नाईक, विदेश नाईक, सुमित नाईक व इतर कार्यकर्त्यांनी परिश्रम घेतले.

आबालवृद्धांनी धरला ठेका

संतांच्या अभंगावरही तरुणाईला नाचवता येते, शिवाय त्यातून मिळणारा सात्विक आनंद वेगळाच असतो हे 'अभंग रिपोस्ट'ने सिद्ध केले. राज्यात आधुनिक पद्धतीने नवी पिढी अभंगांचा ठेवा जपते, याचा उसगावात अनेकांनी अनुभव घेतला. बँडने युवकांबरोबरच लहानथोरांना विठ्ठल नामाच्या गजरात अक्षरशः ठेका धरायला लावला. आधुनिक वेशभूषा केलेल्या सहा युवकांनी पारंपरिक अभंगांना पाश्चात्य संगीताचा बाज चढवत मोठ्या संख्येने उपस्थित ज्येष्ठांच्या काळजाला हात घालत, त्यांना ठेका धरायला, नाचायला आणि फुगड्या खेळायला भाग पाडले.