हॉटेल व्यावसायिकांना चुलीचाच आधार; गॅसअभावी हॉटेल्स बंद

अनेकांनी पुन्हा पारंपरिक चुलीचा पर्याय स्वीकारण्यास सुरुवात केली आहे.

लोकमत न्यूज नेटवर्क, काणकोण: आखाती देशांतील युद्ध परिस्थितीचा परिणाम आता स्थानिक स्तरावरही जाणवू लागला असून काणकोण तालुक्यात व्यावसायिक गॅस सिलिंडरचा पुरवठा खंडित झाल्याने हॉटेल व्यावसायिक अडचणीत सापडले आहेत. परिणामी, अनेकांनी पुन्हा पारंपरिक चुलीचा पर्याय स्वीकारण्यास सुरुवात केली आहे.

चावडी येथे एका हॉटेल व्यावसायिकांनी हॉटेलबाहेर मांडलेली चूल. पूर्वी स्वयंपाकासाठी चुलीचा वापर केल्यामुळे धुरामुळे गृहिणींना विविध आजारांचा सामना करावा लागत होता. तसेच लाकडांच्या वापरामुळे पर्यावरणावरही परिणाम होत असल्याने गॅसचा वापर वाढला होता. शहरांपासून ग्रामीण भागापर्यंत गॅसवर स्वयंपाक करण्याची सवय रूढ झाली होती. मात्र सध्याच्या परिस्थितीत गॅस टंचाईमुळे ही सवय बदलण्याची वेळ आली आहे.

गॅसअभावी हॉटेल्स बंद

काणकोणातील अनेक हॉटेल व्यावसायिकांनी हॉटेलच्या मोकळ्या जागेत चुली पेटवून जेवण बनवण्यास सुरुवात केली आहे. काहींनी मात्र गॅसअभावी आपली हॉटेल्स तात्पुरती बंद ठेवली आहेत.

शुक्रवारी तपासणी मोहीम राबवून हॉटेल्समध्ये घरगुती गॅस सिलिंडरचा गैरवापर होत आहे का, याची पाहणी केली. मात्र अशा प्रकारचा गैरवापर आढळून आला नाही. - उल्हास वेळीप, साहाय्यक संचालक, नागरी पुरवठा खाते