गोव्यातील अभियंत्यांच्या

पणजी : गेले सहा महिने इराणमध्ये अडकलेल्या गोव्यातील दोघा अभियंत्यांच्या सुटकेचा प्रयत्न करण्यासाठी पंतप्रधान नरेंद्र मोदी यांना साकडे घालण्यात आले आहे. संबंधित विषय त्यांच्यापर्यंत पोहचविण्यात आला आहे. पंतप्रधान मोदी शनिवारी गोवा भेटीवर आले असता, पॉवर इंजिनियर्सचे व्यवस्थापकीय संचालक अतुल काणे यांनी पंतप्रधानांना निवेदन सादर करून या विषयात हस्तक्षेप करण्याची मागणी केली आहे. पॉवर इंजिनियरिंग इंडिया प्रा. लिमिटेड कंपनीचे अभियंते महम्मद हुसेन खान व संकेत दिनेशचंद्र पांडे यांना इराणहून भारतात आणण्यासाठी पुढील दहा दिवसांत प्रयत्न झाला नाही तर आंदोलन करण्याचा इशारा ह्युमन राईटस् डिफेंडर्सचे अध्यक्ष अ‍ॅडविनो फर्नांडिस यांनी दिला आहे. या भारतीय अभियंत्यांना कंपनीतून जनरेटर यंत्रे पोहोचविण्यासाठी दुबई येथील दोन कंपन्यात पाठविण्यात आले होते. त्या कंपनीकडून भारतातून पाठविण्यात आलेली यंत्रे इराणमधील जानजान येथील मेसर्स वझाहर जहान कंपनीला विकण्यात आली. पॉवर इंजिनियरिंग कंपनीकडून ही यंत्रे बसविण्यासाठी अभियंत्यांचा एक गट इराणला पाठविण्यात आला होता. खान व पांडे यांनी त्यांच्या गटाच्या अध्यक्षांना सांगितल्याप्रमाणे भारतातून इराण व इराणहून भारतात ने-आण करण्याची पूर्ण जबाबदारी इराणमधील वझाहर जहान कंपनीची होती. महम्मद खान हा यापूर्वी चार वेळा इराण येथे जाऊन आला होता. तो शेवटचा भारतात आल्यानंतर तेथील क्षुल्लक दर्जाच्या सेवेबाबत व्यवस्थापनाला त्याने तक्रार दिली होती. वझाहर जहान कंपनी व व्यवस्थापन मंडळाने अशी गैरसोय पुन्हा होणार नाही असा विश्वास दिला होता. संकेत व खान हे २३ नोव्हेंबर रोजी एकेरी व्हिसावर २२ डिसेंबरपर्यंत कामासाठी इराणला गेले होते. त्या वेळी त्यांच्या समूहाचे सहकारी व प्रकल्प व्यवस्थापक निलालजान दास गुप्ता तिथे उपस्थित होते. काही दिवसांनंतर समूहातील ५ कर्मचारी भारतात परतले. त्यानंतर ५ डिसेंबर रोजी प्रकल्प अधिकारी दास गुप्ताही भारतात परतले. खान व पांडे यांनी १ जानेवारीला २0१४ रोजी पॉवर इंजिनियरिंगचे व्यवस्थापकीय संचालक अतुल पै काणे व जोस फर्नांडिस यांना कळविले की जोपर्यंत पासपोर्ट व व्हिसा मिळत नाही तोपर्यंत आम्ही तेथील कंपनीस भेट देणार नाही. यानंतर वझाहर जहान कंपनीने दोन्ही इंजिनियर्सची सतावणूक करण्यास सुरुवात केली. त्यानंतर पॉवर इंजिनियर्सचे वकील समीप यांनी इराण येथे जाऊन कंपनीच्या विविध अधिकाऱ्यांशी संपर्क साधला. खान व पांडे यांची मानसिक व शारीरिक स्थिती गंभीर असल्याचे जाणवते, असे फर्नांडिस यांनी सोमवारी येथे पत्रकार परिषदेत सांगितले. (प्रतिनिधी)