भाजप प्रदेशाध्यक्ष पद; सहा नावे अखेर शॉर्टलिस्ट, कोअर टीम बैठक यशस्वी

दामू नाईक, नरेंद्र सावईकर, परुळेकर यांच्यात मोठी स्पर्धा; मंडळ अध्यक्षांना वयाची अट, कार्यकर्ते नाराज

लोकमत न्यूज नेटवर्क, पणजी : भाजप प्रदेशाध्यक्ष पदासाठी दावेदार म्हणून सहा इच्छुकांची नावे पक्षाने दिल्लीला पाठवली आहेत. ही माहिती कोअर टीम बैठकीवेळी शुक्रवारी पुढे आली. दामू नाईक, अॅड. नरेंद्र सावईकर, बाबू कवळेकर, दिलीप परुळेकर, दयानंद मांद्रेकर व दयानंद सोपटे, अशी सहा नावे पक्षश्रेष्ठींपर्यंत पोहचली आहेत. येत्या ६ रोजी कोअर टीमची पुन्हा बैठक होणार आहे.

दरम्यान, भाजप मंडल अध्यक्षपदी ३६ विधानसभा मतदारसंघांमध्ये नावे निश्चित झालेली असून या निवडीवरुन पक्षात मोठी स्पर्धा आहे. मंडल अध्यक्षपदासाठी उमेदवार ४५ वर्षांखालील असावा, अशी अट असल्याने अनेक जुन्या व निष्ठावान कार्यकर्त्यांची एवढी वर्षे पक्षासाठी काम करुनही संधी हुकली. पक्षासाठी आम्ही केवळ चपलाच झिजवाव्यात का? असा सवाल नाराज कार्यकर्ते करत आहेत.

'लोकमत'ला मिळालेल्या माहितीनुसार, वेळ्ळी, नुवे, बाणावली व मडकई या चार मतदारसंघांमध्ये भाजपची सदस्य नोंदणी अगदीच अल्प झाली आहे. तिथे बूथदेखील स्थापन करता आलेले नाहीत. त्यामुळे हे चार मतदारसंघ वगळता इतर ३६ मतदारसंघात अध्यक्ष निवडले असून नावांची अधिकृत घोषणा उद्या, रविवारी होणार आहे.

एकीकडे संघटनात्मक निवडणुकांवरुन भाजपमध्ये अंतर्गत कलह सुरु असताना दुसरीकडे मडकई मतदारसंघावरुन भाजप-मगोत संघर्ष निर्माण झालेला आहे. मडकईत भाजपची मंडळ समिती स्थापन झालेली नाही. काही कार्यकर्त्यांची कामे ढवळीकर करत नाहीत, अशी तक्रार एक-दोन भाजप नेते करत आहेत. मात्र, ज्यांची कामे झाली नाहीत असे सांगितले जाते, ते काँग्रेसमधून भाजपमध्ये आले आहेत, असा दावा मंत्री ढवळीकर यांनी भाजपसोबत झालेल्या बैठकीत केल्याचे समजते.

सुदिन दिल्लीत दाखल 

आपल्याविषयी तक्रार करणारे कोण त्यांची नावे सांगा, असा आग्रह ढवळीकर यांनी तीन दिवसांपूर्वी झालेल्या बैठकीत धरल्याचे समजते. परंतु भाजप नेत्यांनी नावे उघड केली नाहीत. सुदिन यांनीही सामंजस्याची भूमिका घेत १९८४ पासून आपण नेहमीच भाजपला सहकार्य करीत आलो आहे, असे सांगितले. दिवंगत मनोहर पर्रीकर यांना सर्व ठाऊक होते संजीव देसाई हेही साक्षीदार आहेत, असेही ते म्हणाले. ढवळीकर यांनी शुक्रवारी दुपारी गोव्याहून दिल्ली गाठली. तिथे ते भाजपच्या काही केंद्रीय नेत्यांना भेटण्याची शक्यता आहे.

'आमचे संबंध चांगले' 

प्रदेशाध्यक्ष सदानंद शेट-तानावडे यांच्याशी संपर्क साधला असता ते म्हणाले की, मंडल अध्यक्षपदांवरुन किंवा अन्य कोणत्याही बाबतीत पक्षात कोणतीच नाराजी नाही. वयोमर्यादा 'वरुन' निश्चित करण्यात आलेली आहे. त्यामुळे त्याचे पालन करावेच लागेल. मंडल अध्यक्षांची नावे रविवारी जाहीर होतील तेव्हा कोणाचीच नाराजी नसेल. मडकई व फोंडा मतदारसंघातील भाजप-मगो संघर्षाबद्दल विचारले असता तसा कोणताही संघर्ष नसल्याचे तानावडे म्हणाले. मगो व भाजप यांचे संबंध एकमेकांशी चांगले आहेत असे ते म्हणाले.