गोव्याला विक्रमी १ कोटी ८ लाख पर्यटकांची भेट; पर्यटन विभागाकडून आकडेवारी जारी

विशेष करून कोरोना काळानंतर पर्यटकांनी पुन्हा एकदा पर्यटनस्थळ म्हणून पसंती दिली जात आहे.

लोकमत न्यूज नेटवर्क, पणजी : गोव्याने देशातील अग्रगण्य पर्यटनस्थळ म्हणून पुन्हा एकदा आपले स्थान मजबूत केले आहे. २०२५ साली राज्याला एकूण १ कोटी ८ लाख २ हजार ४१० पर्यटकांनी भेट दिली. यात १ कोटी २ लाख ८४ हजार ६०८ देशी व ५ लाख १७ हजार ८०२ विदेशी पर्यटकांचा समावेश आहे.

पर्यटन खात्याने ही आकडेवारी जारी केली आहे. विशेष करून कोरोना काळानंतर पर्यटकांनी पुन्हा एकदा पर्यटनस्थळ म्हणून पसंती दिली जात आहे. २०२०, २०२१ व २०२२ या वर्षात पर्यटकांची संख्या बरीच घटली होती. २०२३ पासून पर्यटकांची संख्या पुन्हा एकदा वाढू लागली आहे. दाबोळी व मोपा विमानतळावर आलेल्या चार्टर विमानांतूनही पर्यटक मोठ्या संख्येने गोव्यात दाखल झाले आहेत.

पर्यटन संचालक केदार नाईक म्हणाले, 'गोव्यात येणाऱ्या देशी पर्यटकांच्या संख्येत वाढ झाली आहे. दाबोळी व मोपा विमानतळांवरील वाढती आंतरराष्ट्रीय वाहतूक आणि क्रूझ पर्यटनाचे योगदान, पायाभूत सुविधा, पर्यटन व्यवस्थापनातील एकत्रित प्रयत्नांना आलेले यश आहे.'

वर्षनिहाय आकडेवारीवरून गोव्यातील पर्यटन क्षेत्राची ताकद व नियोजनबद्ध प्रयत्नांचे यश आल्याचे दिसून येते. चार्टर, क्रुझ व आंतरराष्ट्रीय उड्डाणांमधून गोव्यात येणाऱ्या विदेशी पर्यटकांच्या संख्येत वाढ होत आहे. यात मोपा विमानतळाची भूमिका महत्त्वाची ठरली आहे, असे पर्यटन मंत्री रोहन खंवटे यांनी नमूद केले.

आकडेवारी पर्यटकांची

वर्ष	पर्यटकांची एकूण संख्या
२०१७	७७ लाख ८५ हजार ६९३
२०१८	८० लाख १५ हजार ४००
२०१९	८० लाख ६४ हजार ४००
२०२३	८६ लाख २८ हजार १६२
२०२४	१ कोटी ४ लाख ९ हजार १९६

 

क्रुझद्वारे आलेले पर्यटक

वर्ष	क्रुझ संख्या	पर्यटक संख्या
२०२२	५	१२ हजार ८५६
२०२३	५२	५८ हजार ६०३
२०२४	५०	६६ हजार ५५५
२०२५	३७	५१ हजार ५१०

 

चार्टर विमानाद्वारे आलेले पर्यटक

वर्ष	चार्टर विमाने	पर्यटक संख्या	विमानतळ
२०१७	१०२४	२ लाख ४९ हजार ३७४	दाबोळी
२०१९	७९९	२ लाख १६ हजार ७३८	दाबोळी
२०२३	३५६	७२ हजार ७९५	मोपा
२०२४	२६६	५८ हजार ६८०	मोपा
२०२५	१८९	४० हजार ३३६	मोपा