‘सुडा’तर्फे राज्यात ६0 कोटींचे प्रकल्प

पणजी : ‘सुडा’चे ६0 कोटींचे वेगवेगळे प्रकल्प मार्गी लागले आहेत. म्हापशात २0 कोटी रुपये खर्चून सौंदर्यीकरण, तसेच भाजी मार्केट बांधण्यात येत असून वाळपईत १२ कोटींचा मार्केट प्रकल्प होत आहे. सांगे, काणकोण, साखळी येथेही बांधकामे चालू आहेत. सांगे येथे कबरस्थान तसेच मार्केट प्रकल्पाचे काम चालू आहे, अशी माहिती ‘सुडा’चे उपाध्यक्ष राजसिंह राणे यांनी पत्रकार परिषदेत दिली. केपे, मुरगाव, फातोर्डा भागातही नव्या प्रकल्पांची कामे हाती घेतली जाणार आहेत. पालिका प्रशासन संचालक एल्विस गोम्स हेही या वेळी उपस्थित होते. एका प्रश्नावर उत्तर देताना त्यांनी सांगितले की, बहुतांश पालिकांनी कचरा प्रकल्पांच्या बाबतीत अहवाल सादर केलेले आहेत. डिचोली येथील कचरा प्रकल्प चांगल्या पध्दतीने चालू आहे. घरोघरी फिरून कचरा गोळा करण्याचे कामही तेथे बर्‍यापैकी चालू असून प्रयोग १00 टक्के यशस्वी झाला असल्याचा दावा त्यांनी केला. फोंड्यात ५0 टक्के प्रयोग यशस्वी झालेला आहे. घरोघरी फिरून कचरा गोळा करणे व तो वेगवेगळा काढणे याबाबत मडगाव पालिकेने मात्र काहीच काम केलेले नसल्याचे गोम्स यांनी सांगितले. या वेळी सल्लागार गौरव पोकळे हेही उपस्थित होते. येत्या ५ रोजी जागतिक पर्यावरणदिनानिमित्त विशेष कार्यक्रमाचे आयोजन करण्यात आले असल्याची माहिती त्यांनी दिली. ओला व सुका कचरा कसा हाताळावा याबाबत राज्यस्तरीय परिषद होणार आहे. घन कचर्‍याबाबतच्या नियमांची अंमलबजावणी योग्यरीत्या होत नसल्याने त्याबाबत जनजागृती केली जाणार आहे. पालिकांना कचराकुंड्या, ट्रॉली देण्यात येणार असल्याचे या वेळी सांगण्यात आले. मनपाच्या कचरा विल्हेवाटीसाठी आमदार बाबूश मोन्सेरात यांनी ताळगावात २५ हजार चौरस मीटर जमीन देऊ केली आहे त्याबाबत विचारले असता तसा अधिकृत प्रस्ताव अजून आलेला नाही, असे पालिका प्रशासन संचालकांनी स्पष्ट केले. (प्रतिनिधी)