१५० कोटींचे पर्यटन प्रकल्प मंजूर

पणजी : कांपाल येथील युथ हॉस्टेलपासून रेईश मागूश किल्ल्यापर्यंत रोप-वे प्रकल्प राबविणे व सागरी विमान पर्यटनास चालना देणे, अशा प्रकारच्या प्रस्तावांना आता मूर्त स्वरूप येणार आहे. सरकारच्या पर्यटनविषयक टास्क फोर्सच्या काल झालेल्या बैठकीत या प्रकल्पांसह एकूण १५० कोटी रुपये खर्चाचे विविध प्रस्ताव मंजूर करण्यात आले. पर्यटनमंत्री दिलीप परुळेकर यांनी गुरुवारी ही माहिती ‘लोकमत’ला दिली. गोव्याच्या पर्यटनाचा अधिक विकास होण्याच्या दृष्टीने विविध प्रकल्प राबविण्यास सरकार सज्ज झाले असून अनेक प्रस्ताव टास्क फोर्सने मंजूर केले आहेत. युथ हॉस्टेलपासून रेईश मागूश किल्ल्यापर्यंत म्हणजे १.४ किलोमीटर अंतरात रोप-वे प्रकल्प अस्तित्वात येणार आहे. जुलै महिन्याच्या पहिल्या आठवड्यात याबाबतच्या कामाची निविदा जारी केली जाईल, असे मंत्री परुळेकर यांनी सांगितले. या प्रकल्पासाठी ७८ कोटी रुपये मंजूर करण्यात आल्याचे त्यांनी स्पष्ट केले. फर्मागुडी येथे हॉटेल व्यवस्थापन संस्था उभी केली जाणार आहे. त्यासाठी २३ कोटी रुपये मंजूर करण्यात आले आहेत. या संस्थेत गोमंतकीय मुलांना ५० टक्के जागा आरक्षित करून मिळाव्यात, असा प्रयत्न सरकार करणार आहे. कला अकादमीपासून सांता मोनिका जेटीपर्यंतच्या पट्ट्यात रस्त्याच्या कडेने पणजीचे सौंदर्यीकरण केले जाणार आहे. एकूण ३० कोटींचा हा प्रकल्प आहे. तसेच नव्या पाटो पुलाकडे रोषणाई करून तिथेही विशेष सौंदर्यीकरण केले जाईल, असे परुळेकर यांनी सांगितले. पर्यटन क्षेत्रात विविध प्रकारच्या साधनसुविधा यापुढे वाढविल्या जाणार आहेत, असे त्यांनी स्पष्ट केले. (खास प्रतिनिधी)