महिलांची दारूविक्री अड्ड्यावर धाड

दारूविक्री बंद करण्यासंदर्भात ३१ डिसेंबरचा अल्टीमेटम देऊनही गावात दारूविक्री सुरूच ठेवल्याने गावातील महिलांनी दारूविक्रीच्या अड्ड्यावर धाड टाकून दारूविक्रेत्याला पोलिसांच्या स्वाधीन केले.

वैरागड : दारूविक्री बंद करण्यासंदर्भात ३१ डिसेंबरचा अल्टीमेटम देऊनही गावात दारूविक्री सुरूच ठेवल्याने गावातील महिलांनी दारूविक्रीच्या अड्ड्यावर धाड टाकून दारूविक्रेत्याला पोलिसांच्या स्वाधीन केले.
शासनाने गडचिरोली जिल्ह्यात दारूविक्रीला बंदी घातली असली तरी कुरखेडा तालुक्यातील कढोली येथे दारूची खुलेआम विक्री केली जात होती. त्यामुळे अनेक कुटुंब देशोधडीला लागले होते. गावाचा व कुटुंबाचा विकास करण्यासाठी दारूविक्री बंद केल्याशिवाय दुसरा कोणताच पर्याय शिल्लक नसल्याने कढोली येथील महिलांनी आठ दिवसांपूर्वी सभा घेऊन दारूविक्रीला प्रतिबंध करणारी स्वतंत्र समिती स्थापन केली. गावातील सर्वच दारूविक्रेत्यांना ३१ डिसेंबर २०१४ चा अल्टीमेटम दिला होता. मात्र पोलिसांशी संधान असल्याने निगरगट्ट व मुजोर झालेल्या दारूविक्रेत्यांनी या इशाऱ्याकडे दुर्लक्ष करीत दारूविक्री सुरूच ठेवली. त्यामुळे संतप्त झालेल्या गावातील महिलांनी अवैध दारूविक्री अड्ड्यांवर धाड टाकून दारू जप्त केली. दारूविक्रीविरोधात कारवाई केली जात असताना एका दारूविक्रेत्याने महिलेच्या बोटाचा चावा घेऊन जखमी केले. दारू पकडल्यानंतर याबद्दलची माहिती गावकऱ्यांनी कुरखेडा पोलिसांना दिली. पोलीस घटनास्थळी दाखल झाले. मात्र दारूविक्रेत्याला अटक करण्यास पोलिसांनी टाळाटाळ केल्याने महिलांनी दारूविक्रेत्याला अटक करण्याची मागणी लावून धरली. एवढेच नाही तर दारूविक्रेता पोलिसांच्या वाहनात बसण्यासाठी तयार नसतानाही पोलीस मात्र दारूविक्रेत्याला एखाद्या महत्वाच्या व्यक्तिप्रमाणे सौजन्याची वागणूक देत होते.
पुढे पोलिसांचे वाहन, त्यामागे अवैध दारूविक्रेते, पोलीस व गावकऱ्यांची गर्दी अशा स्थितीत दारूविक्रेत्यांना गावाबाहेर काढण्यात आले. त्यानंतर पोलिसांनी दारूविक्रेत्याला गाडीत बसविले. महिलांनी २ जानेवारी रोजीसुद्धा काही दारूविक्रेत्यांच्या अड्ड्यांवर धाड टाकून दारू जप्त केली. (वार्ताहर)
कुरखेडा पोलिसांच्या कार्यशैलीवर प्रश्नचिन्ह
महिलांनी हिंमत करून पोलिसांना दारूविक्रेत्यांना पकडून देऊनही कुरखेडा पोलीस दारूविक्रेत्याला अटक करण्यास तयार नव्हते. त्याचबरोबर त्याला एखाद्या व्हीआयपी व्यक्तीप्रमाणे सौजन्याची वागणूक देत होते. पोलिसांच्या अशा वागणुकीमुळे कढोली परिसरातील नागरिकांनी प्रश्नचिन्ह उपस्थित करण्यास सुरूवात केली आहे.