जिल्ह्यात सोमवारपासून अनलॉक

जिल्ह्याचा पॉझिटिव्हिटी दर ६.५१ टक्के असून ऑक्सिजन बेडही पुरेशा प्रमाणात शिल्लक आहेत. त्यामुळे कोरोनाची स्थिती खूप चांगली नसली तरी बरीच नियंत्रणात आहे. त्यामुळे पाच लेव्हलपैकी गडचिरोली जिल्हा तिसऱ्या लेव्हलला आला आहे. ही स्थिती अजून सुधारल्यास लॉकडाऊनची बंधने अजून कमी केली जाणार आहे.

काय सुरू राहील?

१) सर्व अत्यावश्यक सेवेतील दुकाने सकाळी ७ ते दुपारी ४ वाजेपर्यंत आठवड्याचे सर्व दिवस सुरू राहतील.

२) अत्यावश्यक सेवेतील वगळून इतर दुकाने सकाळी ७ ते ४ वाजेपर्यंत पण केवळ सोमवार ते शुक्रवार सुरू राहतील.

३) रेस्टॉरेंट, खानावळीत सोमवार ते शुक्रवार ५० टक्के उपस्थितीत बसून नाश्ता, जेवण करण्याची परवानगी.

४) सकाळी ७ ते ९ पर्यंत सकाळी फिरायला जाण्यास परवानगी असेल, तसेच क्रीडांगणावर सकाळ-संध्याकाळ खेळता येईल.

५) ५० लोकांच्या मर्यादेत लग्न किंवा इतर कार्यक्रम घेता येईल. अंत्यसंस्कारासाठी मात्र २० ची मर्यादा कायम राहील.

६) आंतरजिल्हा जाण्यासाठी आता ई-पासची गरज पडणार नाही. एसटी बसेस १०० टक्के क्षमतेने सुरू राहतील.

कायम बंद राहील?

१) संध्याकाळी ५ ते सकाळी ७ वाजेपर्यंत जमावबंदी आदेश लागू राहील. त्यामुळे अत्यावश्यक कामे वगळता कोणालाही घराबाहेर पडता येणार नाही.

२) लेव्हल-५ मध्ये असलेल्या जिल्ह्यातून किंवा दुसऱ्या राज्यातून येण्यासाठी ई-पास घ्यावी लागेल. उर्वरित जिल्ह्यातून येण्यासाठी पासची गरज राहणार नाही.

३) मॉल, सिनेमागृह आणि पानठेले आदी उघडण्यास अद्याप परवानगी राहणार नाही. भविष्यात स्थिती सुधारल्यास त्याला परवानगी मिळू शकेल.

कोट-

लॉकडाऊनमध्ये बऱ्याच प्रमाणात शिथिलता देण्याचा निर्णय झाला आहे. रविवारी त्याबाबतचा आदेश काढला जाईल. दर आठवड्याला स्थितीचा आढावा घेऊन परिस्थितीनुसार निर्बंध अजून शिथिल करायचे, की आणखी कडक करायचे याचा निर्णय घेतला जाईल. त्यामुळे नागरिकांनी बिनधास्तपणे न वागता स्थिती नियंत्रणात ठेवण्यासाठी मदत करावी.

- दीपक सिंगला, जिल्हाधिकारी