'तो' माल गाडीतून उतरवित असतानाच पोलिसांनी गवसले ; आठ लाखांच्या मुद्देमालासह एकाला अटक

देसाईगंजात कारवाई: आठ लाखांचा मुद्देमाल जप्त

गडचिरोली : शहरातील एका व्यापाऱ्याने प्रतिबंधित सुगंधित तंबाखूची गाडी बोलावली. मात्र, माल उतरवित असतानाच पोलिस धडकले अन् गोरखधंद्याचा पर्दाफाश झाला. ही कारवाई ९ ऑक्टोबरला मध्यरात्री करण्यात आली. यावेळी एकास जागीच पकडले तर एक पळून गेला. एकूण तिघांवर गुन्हा नोंदविण्यात आला असून तब्बल सव्वा आठ लाखांचा मुद्देमाल जप्त केला आहे.  ललित गोपालदास राठी (रा. अर्जुनी मोरगाव, जि. गोंदिया) हा देसाईगंज परिसरात आपल्या चारचाकीतून सुगंधित तंबाखूची अवैधरीत्या वाहतूक करीत असल्याच्या माहितीवरुन गुन्हे शाखेच्या पथकाने   कन्नमवार वाॅर्डकडे जाणाऱ्या रस्त्यावर सापळा रचला. त्यावेळी संशयास्पद गाडी दिसून आली. त्यातून  राज प्रोव्हिजन्स किराणा दुकाणासमोर थांबवून काहीतरी सामान उतरवित असल्याचे आढळले. छापा टाकताच एकजण वाहनाजवळील पिशवी टाकून पसार झाला; मात्र चालक ललित राठीला पोलिसांनी पकडले. पळून गेलेल्याचे नाव दुकानमालक इंद्रकुमार नागदेवे (रा. देसाईगंज) असल्याचे ललित राठीने सांगितले. हा माल रवी मोहनलाल खटवानी ( रा. गोंदिया ) याच्या मालकीचा असून त्याने विक्री करण्यासाठी  आपल्याकडे सोपविल्याची कबुलीही त्याने दिली. 

तिघांवर गुन्हा नोंद, दोघे फरार

दोन वेगवेगळ्या कंपनीचा प्रतिबंधित ३ लाख ३ हजार १५० रुपयांचा तंबाखू व तीन लाखांचे वाहन तसेच रोख २ लाख १९ हजार ६०० रुपये असा एकूण ८ लाख २२ हजार ७५० रुपयांचा मुद्देमाल पोलिसांनी हस्तगत केला. देसाईगंज ठाण्यात तिघांविरुद्ध गुन्हा दाखल करण्यात आला आहे. अटक आरोपी ललित राठी असून, इतर दोन आरोपी फरार आहेत.

यांनी केली कारवाई

स्थानिक गुन्हे शाखेचे पोलिस निरीक्षक अरुण फेगडे यांच्या नेतृत्वाखाली स.पो.नि. भगतसिंग दुलत, अंमलदार राजू पंचफुलीवार व अंमलदार दीपक लोणारे यांनी कारवाई पार पाडली. तपास सहायक निरीक्षक प्रेमकुमार दांडेकर करीत आहेत.