पिकअप वाहनाची दुचाकीला धडक, दोन गंभीर

लाेकमत न्यूज नेटवर्क

धानाेरा : धानाेरा-मुरुमगाव मार्गावर सालेभट्टी गावाजवळ पिकअप या मालवाहू वाहनाची दुचाकीला धडक बसल्याने दुचाकीवरील युवक व युवती गंभीर जखमी झाल्याची घटना २७ जानेवारी रोजी सायंकाळी ४.१५ वाजेच्या सुमारास घडली. स्वप्निल राजीराम तुलावी (रा. चव्हेला, ता. धानोरा) व मामिता निखिल किरंगे (रा. खेडी (येरकड), ता. धानोरा) अशी जखमींची नावे आहेत.

एम एच ३३-यू ०५४८ या दुचाकी वाहनाने अपघातग्रस्त युवक-युवती येत होते. प्राप्त माहितीनुसार सदर युवती ही धानोरा येथील आय.टी.आय.मध्ये ड्रेस मेकिंगचे प्रशिक्षण घेत आहे, तर युवक हा डब्बा या गावी बांबू तोडण्याचे काम करतो. ताे तेथेच राहत होता. सदर युवक काही कामानिमित्त धानोरा येथे आला होता. मुरुमगावाकडे जाणारी शेवटची बस ४.१५ वाजता आहे. त्यानंतर त्या मार्गाने जाण्यास दुसरे साधन नाही. ती शेवटची बस सुटल्याने त्याच मार्गाने जाणाऱ्या युवकाच्या दुचाकीवर बसून दोघे बस पकडण्यासाठी बसचा पाठलाग करीत जात होते. परंतु, सालेभट्टीजवळ वळणावर बसला ओव्हरटेक करताना समोरून येणाऱ्या पिकअपची दुचाकीला धडक बसली. यामध्ये दुचाकीवरील दोघेही जखमी झाले. युवतीचा पाय फ्रॅक्चर झाला असून, कंबर व डोक्याला मार लागल्याने दोघांनाही धानोराच्या ग्रामीण रुग्णालयात आणून प्राथमिक उपचारानंतर गडचिरोली येथे रेफर करण्यात आले. पिकअप वाहन धडक मारून पसार झाले, त्यामुळे नंबर मिळाला नाही.