सीबीएसई प्रश्नपत्रिकांवरील क्यूआर कोडच्या अफवांपासून सावध राहा; मंडळाचे आवाहन

जाणीवपूर्वक चुकीची माहिती पसरविण्याचा प्रयत्न

लोकमत न्यूज नेटवर्क, मुंबई : केंद्रीय माध्यमिक शिक्षा बोर्डाने बारावीच्या गणिताच्या  प्रश्नपत्रिकांवरील क्यूआर कोडसंदर्भात मोठ्या प्रमाणावर गैरसमज निर्माण झाले असून, ते दूर करण्यासाठी अधिकृत सूचना जारी केली आहे. त्यानुसार सोशल मीडियावर पसरत असलेल्या चुकीच्या दाव्यांबाबत मंडळाने भूमिका मांडली. या क्यूआर कोडच्या अफावांपासून सावध राहाण्याचे आवाहन सीबीएसई मंडळाने केले आहे.

बारावीच्या गणितच्या पेपरात ९ मार्च रोजी प्रश्नपत्रिकेवरील क्यूआर कोड स्कॅन केल्यानंतर वेगळीच लिंक ओपन झाली. मात्र, बोर्डाने सांगितले की, प्रश्नपत्रिकांवरील क्यूआर कोड हे थेट इंटरनेट लिंक म्हणून दिली नाही. हा कोड अंतर्गत प्रमाणिकरण, ट्रॅकिंग आणि परीक्षा प्रक्रियेची पारदर्शकता राखण्यासाठी वापरले जातात. क्यूआर कोड स्कॅन केल्यावर कोणतीही वेबसाइट उघडत नाही, असे स्पष्ट केले.

जाणीवपूर्वक चुकीची माहिती पसरविण्याचा प्रयत्न

मंडळाने नमूद केले की, हे शोध परिणाम अल्गोरिदमवर आधारित असून, त्यांचा केंद्रीय माध्यमिक शिक्षा बोर्ड किंवा परीक्षा प्रक्रियेशी कोणताही थेट संबंध नाही. त्यामुळे अशा माहितीवर विश्वास ठेवू नये, असे स्पष्ट करण्यात आले. काही घटक जाणीवपूर्वक चुकीची माहिती पसरवून मंडळाची प्रतिमा मलिन करण्याचा प्रयत्न करत असल्याचेही निरीक्षण सीबीएसई मंडळाच्या प्रशासनाकडून नोंदवले गेले आहे. क्यूआर कोडचा संबंध असंबंधित व्यक्ती किंवा बाबींशी जोडणे चुकीचे आहे, असे सीबीएसईने म्हटले आहे.