सदगुरू पाटील, निवासी संपादक, लोकमत, गोवा -
गोवा विधानसभेचे पावसाळी अधिवेशन सध्या सुरू आहे. त्यात ‘रिव्होल्युशनरी गोवन्स’ या पक्षाचे तरुण आणि धडाकेबाज आमदार वीरेश बोरकर यांनी परवाच आपला अनुभव जाहीरपणे सांगितला. रस्त्याने जात असताना त्यांची गाडी थांबवून एका दलालाने आमदार महोदयांना विचारले, “सर, लडकी चाहिए क्या?”- अशाच प्रकारचा अनुभव गोव्यातले एक सरपंच जोझेफ सिक्वेरा यांनाही काही महिन्यांपूर्वी आला होता. त्यांनीही त्याबद्दल जाहीरपणे खेद आणि संताप व्यक्त केला होता.देवभूमी असलेल्या गोव्याचे रूपांतर पर्यटनाच्या माध्यमातून भोगभूमीत करण्यासाठी काही टोळ्या कार्यरत आहेत. ही स्थिती गोव्याचे पर्यटनमंत्री रोहन खंवटे हेदेखील नाकारत नाहीत. सत्ताधारी भाजपचेच आमदार मायकल लोबो यांनी तर गोव्यात ड्रग्ज व्यवसाय मोठ्या प्रमाणात चालतो व त्यामुळे पर्यटन बदनाम होत आहे, अशी खंत वारंवार व्यक्त केली आहे. हे असे धिंडवडे निघत असताना गोव्यातला सामान्य माणूस एकच प्रश्न विचारतो आहे : गोवा सरकार व गोव्याची पोलिस यंत्रणा काय करतेय? गोवा म्हणजे मद्य आणि ड्रग्ज असे समीकरण होतेच, आता त्यात मुली पुरविणाऱ्या टोळ्या दाखल झाल्या आहेत. गोव्यात दारू अगदी सहज व स्वस्त मिळते आणि सगळे गोयंकार दारू पिण्यातच धन्यता मानतात असा ठार चुकीचा समज कधीचा रूढ झालेला आहे. साडेचारशे वर्षांच्या पोर्तुगीज राजवटीमुळे गोव्यात सुशेगाद (आरामदायी) जीवनशैलीचे बियाणे रोवले गेले. पण, सुशेगाद असणे म्हणजे बेमुर्वत चंगळ आणि हुल्लड नव्हे, हे गोमंतकीय जाणतात. पर्यटनावर गोव्याची अर्थव्यवस्था बऱ्याच अंशी अवलंबून आहे, हेही खरे. पर्यटकांना पूर्वी केवळ मद्याचेच आकर्षण असायचे. आता ड्रग्ज व मुली मिळविण्याचे आकर्षण वाटू लागलेय हे धक्कादायक आहे. गोव्यात अधूनमधून काही मसाज पार्लर्सवर पोलिस छापे टाकत असतात. या पार्लर्समधून शरीरविक्रयाचा धंदा चालतो, हे उघड आहे. उत्तर व दक्षिण गोव्याच्या किनारपट्टीत काही दलाल फिरत असतात. हे दलाल पर्यटकांना गाठून तुम्हाला ड्रग्ज किंवा उपभोगासाठी मुली हव्यात का, असे उघडपणाने विचारतात. ड्रग्ज किंवा मुली पुरविण्याचे खोटे आश्वासन देऊन पर्यटकांना लुटले जाण्याच्या घटनाही घडलेल्या आहेत. गोव्यात वार्षिक सरासरी ड्रग्जविरोधी शंभरेक तरी छापे पडत असतात. जास्त चिंतेची बाब म्हणजे अनेक गोमंतकीय युवकच आता ड्रग्ज विक्री किंवा ड्रग्जचे सेवन करण्याच्या वाटेने जाऊ लागले आहेत. पूर्वी विदेशी व्यक्ती किंवा हिमाचल प्रदेश, काश्मीर आदी ठिकाणच्या युवकांना गोव्यात ड्रग्ज विक्रीच्या व्यवहारांमध्ये पकडले जात होते. आता गोमंतकीय युवकही पकडले जात आहेत. गोव्यातील मांडवी नदी आणि अनेक हॉटेलांमध्ये कसिनो (जुगाराचे अड्डे) सुरू झाले. कायदेशीर पद्धतीने जुगार खेळून पर्यटक व गोव्यातील भूमिपुत्र असे दोघेही उद्ध्वस्त होऊ लागले आहेत. गोव्यात होत असलेला पर्यटनाचा स्फोट या राज्याला पुढील वीस वर्षांनंतर कुठे नेऊन ठेवील हा प्रश्न कुणाचेही डोके बधिर करील.टिकटॉक स्टार सोनाली फोगाट हिचा काही महिन्यांपूर्वी गोव्यात पार्टीला जाऊन आल्यानंतर मृत्यू झाला. ड्रग्जच्या अतिसेवनाने तिचा मृत्यू झाला, हे लपून राहिले नाही. गोव्यात येणारे विदेशी पर्यटकही गोव्याची प्रतिमा बिघडविण्यास हातभार लावत आहेत. २०२० ते जून २०२३ या तीन वर्षांत दोनशेहून अधिक गुन्हे पोलिसांत असे नोंद झाले, ज्या गुन्ह्यांमध्ये विदेशी व्यक्ती संशयित आरोपी आहेत. अनेक विदेशी पर्यटक गोव्यात एकदा आल्यानंतर परत मायदेशी जातच नाहीत. ते गोव्यातच बेकायदा वास्तव्य करतात. आपला पासपोर्ट जाळून टाकतात व परत जाण्याचा मार्ग बंद करून टाकतात. ही एक वेगळीच समस्या आहे. अशा प्रकारांबाबत पूर्वी माजी मुख्यमंत्री स्वर्गीय मनोहर पर्रीकर यांनीही चिंता व्यक्त केली होती.एरवी संस्कृतीच्या गप्पा ठोकत पणजीत मात्र कसिनोंसाठी पायघड्या अंथरणाऱ्या गोव्यातील सगळ्याच राज्यकर्त्यांनी विचार करण्याची वेळ आली आहे. काँग्रेसने कसिनो आणले व भाजपने त्या कसिनोंचा विस्तार केला. “केसिनोंमे जाना है क्या?” असे पर्यटकांना दलाल विचारतातच; आता खुद्द आमदारांनाच ‘लडकी चाहिए क्या?’ असे विचारण्यापर्यंत त्यांची मजल गेली आहे. - sadguru.patil@lokmat.com