तेंडुलकरांची सारा आणि नवं क्रिकेट!

Sara Tendulkar News: सारा तेंडुलकर. भारतीयांच्या गळ्यातला ताईत असलेल्या सचिन तेंडुलकरची लेक. तिनं केलेली साधी सोशल मीडिया पोस्टही कायम व्हायरल होते. मात्र, या आठवड्यात ती वेगळ्याच कारणानं चर्चेत आहे.

सारा तेंडुलकर. भारतीयांच्या गळ्यातला ताईत असलेल्या सचिन तेंडुलकरची लेक. तिनं केलेली साधी सोशल मीडिया पोस्टही कायम व्हायरल होते. मात्र, या आठवड्यात ती वेगळ्याच कारणानं चर्चेत आहे. तिनं ग्लोबल ई-क्रिकेट प्रीमिअर लीगमध्ये मुंबई फ्रँचायझी विकत घेतली आहे. ही लीग म्हणजे ऑनलाइन क्रिकेट गेमिंग लीग आहे. गेल्या वर्षी ही लीग सुरू झाली आणि आता मेमध्ये दुसरा सीझन सुरू होतो आहे. फ्रँचायझी क्रिकेट हा जगभरच आता अत्यंत नफा कमवून देणारा व्यवसाय झालेला असताना आणि त्याला लाेकप्रियता लाभत असताना आता या नव्या ई-क्रिकेट लीगमध्ये सारा तेंडुलकरही आपल्या टीमसह दाखल होते आहे.

सचिनची लेक आणि क्रिकेटशी संबंधित काही करणार तर त्याची जगभर चर्चा होणं साहजिक आहे. मात्र, सारानं त्यासंदर्भात फार काही बोलणं टाळलंच आहे. युनिव्हर्सिटी कॉलेज लंडनमधून सारानं मास्टर्स केलं आहे. क्लिनिकल ॲण्ड पब्लिक हेल्थ न्यूट्रिशन या विषयातली पदवी घेऊन भारतात परतल्यावर तिनं काही काळ मॉडेलिंगही करून पाहिलं. त्यानंतर आता मात्र नुकतंच तिनं ‘सचिन तेंडुलकर फाउण्डेशन’ या संस्थेत संचालक म्हणून कार्यभार स्वीकारला आहे. 

लहान मुलांसाठी काही भक्कम काम उभं करण्याचा, याच क्षेत्रात करिअर करण्याचा तिचा विचार आहे हे तिच्या वडिलांनीच सोशल मीडियात प्रसिद्ध करून सांगितलं.
अर्थात हे काम करत असताना ई-क्रिकेट लीगमधली फ्रँचायझीही तिने विकत घेतली आहे. भारतातल्या नव्या इन्फ्लुएन्सर फ्रेण्डली इको सिस्टममध्ये सारा तेंडुलकर हे अर्थातच मोठं नाव आहे. हे सारं सुरू असताना साराचं नाव कुणाकुणाशी जोडलं जाण्याचा गॉसिपखेळ सुरू असतो. मात्र, आपली डिसेन्सी सांभाळत तिनं आजवर कुठल्याच गोष्टींचा वाद-प्रतिवाद केलेला नाही. आडनावापलीकडे स्वत:ची वाट शोधत निघालेली ही हसरी तरुणी, तिच्या ग्लॅमरस जगण्याची चर्चा तर अटळ आहे.