उडती छत्री, जी मालकाला ओलं होऊ देणार नाही!

मातीची घरं असणारे लोक आपलं घर पावसाळ्यात गळणार तर नाही ना, याची काळजी घेतात. 

पावसाळा सुरू झाला किंवा पावसाळ्याच्या उंबरठ्यावर लोकांची लगबग सुरू होते. दुकानदार, त्यातही रस्त्यावरील फेरीवाले आपला माल ओला तर होणार नाही ना, याची काळजी घेतात. त्याची तजवीज आधीच करून ठेवतात. मातीची घरं असणारे लोक आपलं घर पावसाळ्यात गळणार तर नाही ना, याची काळजी घेतात. 

सर्वसामान्य नागरिक गेल्या वर्षाचे आपापले रेनकोट काढून ठेवतात किंवा नवे रेनकोट घेतात. काही नागरिक सर्वात आधी आपली छत्री तपासतात, कुठं ती फाटली तर नाही ना किंवा नवी छत्री घ्यायची आवश्यकता आहे का, हे तपासतात. छत्री खराब झाली असेल तर ती दुरुस्त करून घेतात. पण आता पारंपरिक छत्री घेऊन चालण्याची, ती हातात धरायची आणि पावसापासून वाचायची कसरत करण्याची अनेक लोकांची झंझटच कायमची संपणार आहे!कितीही जोराचा पाऊस असू द्या, हे लोक पावसात बिनधास्त चालत फिरतील. अंगावर ना रेनकोट, ना हातात छत्री! लहान मुलांच्या गोष्टींमध्ये जसा उडता गालिचा असतो, तसा एक उडता गालिचा या व्यक्तींच्या मागोमाग फिरेल आणि त्यांच्या अंगावर पावसाचा थेंबही पडणार नाही याची काळजी घेईल! हो, लहान मुलांच्या गोष्टीतली ही कहाणी नाही, पण हे खरोखर प्रत्यक्षात आलं आहे. 

हाँगकाँगमधल्या एका इंजिनिअरनं उडणारी छत्री बनवली आहे. या इंजिनिअरचं नाव आहे जॉन त्से. त्याने अशी छत्री तयार केली आहे, ज्या छत्रीला हात लावायचीच गरज नाही! या छत्रीचा मालक जसा जाईल आणि जिथे जाईल तिथे ही छत्री आपल्या मालकाच्या डोक्यावर घिरट्या घालत राहते आणि त्याच्यासोबत चालत राहते! 

ही अनोखी छत्री ड्रोन तंत्रज्ञानावर आधारित आहे. यात ‘टाइम-ऑफ-फ्लाइट डेप्थ’ कॅमेरा बसवला आहे, जो व्यक्तीचं अंतर आणि लोकेशन मोजतो. ‘रास्पबेरी पाय कॉम्प्युटर’ हा डेटा प्रोसेस करतो आणि फ्लाइट कंट्रोलरला सूचना देतो. त्यानंतर ही छत्री वापरकर्त्याच्या डोक्यावर केंद्रित राहून त्याच्या हालचालींप्रमाणे पुढे-मागे हलत राहते.

खरं तर जॉन त्से यांनी सुरुवातीला हा उपक्रम दोन आठवड्यांचा प्रोजेक्ट म्हणून सुरू केला होता. मात्र यात त्याला अनेक तांत्रिक अडचणी आल्या. त्यामुळे हा प्रोजेक्ट अनेक वर्षं चालत राहिला. त्यानं बनवलेला सुरुवातीचं मॉडेल रिमोट कंट्रोलवर चालत होतं, पण आता ही छत्री पूर्णपणे स्वयंचलित आहे.

ही छत्री कस्टम ड्रोन फ्रेमवर आधारलेली आहे, ज्याला फोल्डिंग आर्म्स आहेत. वर सामान्य छत्री बसवलेली आहे, त्यामुळे खाली असलेलं गुंतागुंतीचं तंत्रज्ञान दिसत नाही. वापरात नसताना या छत्रीचा आकार ट्रायपॉडएवढा होतो. या छत्रीच्या अनेक चाचण्या घेण्यात आल्या. पण पाऊस कसाही असो, उभा, तिरपा, वेडावाकडा.. ही छत्री आपल्या मालकाला ओलं होऊ देत नाही. जोरदार पावसातही ही छत्री यशस्वीपणे काम करताना दिसली. मुसळधार पावसातही छत्री धरायची झंझट संपल्यानं अनेक नागरिकांनी आनंद व्यक्त केला आहे. ही छत्री आपल्यापर्यंत कशी आणि कधी येईल, याची ते प्रतीक्षा करीत आहेत. सर्वसामान्य लोक, शेतकरी, फेरीवाले, विद्यार्थी या छत्रीची प्रतीक्षा करताहेत...