Health check up of bus drivers | बसचालकांची होणार आरोग्य तपासणी

बसचालकांची होणार आरोग्य तपासणी

धुळे : महाराष्ट्र राज्य परिवहन महामंडळाच्या धुळे आगारातर्फे स्थलांतरीत कामगारांना त्यांच्या इच्छितस्थळी सोडणारे, तसेच कोटा (राजस्थान) येथून विद्यार्थ्यांना आणणाऱ्या बस चालकांची त्यांच्या सुरक्षितेसाठी तत्काळ आरोग्य तपासणी करुन घ्यावी, असे निर्देश जिल्हाधिकारी संजय यादव यांनी महामंडळाच्या विभाग नियंत्रक मनीषा सपकाळ यांना दिले आहेत.
कोरोना विषाणूचा प्रादुर्भाव रोखण्यासाठी लॉकडाउन जाहीर करण्यात आला आहे. त्यामुळे महाराष्ट्रातील विविध भागातील विद्यार्थी हे कोटा येथे अडकले होते. त्यांना आणण्यासाठी धुळे विभागातून ७२ बसेस सोडण्यात आल्या होत्या. त्यामुळे एक हजार २४ विद्यार्थी आपापल्या घरी सुखरुप पोहोचले. तसेच ९ ते २५ मे या कालावधीत धुळे जिल्ह्यातून पायी जाणाºया श्रमिकांना गुजरात, मध्यप्रदेश, छत्तीसगडच्या सीमेवर बसद्वारे सोडण्यात आले. एकूण ४८८ बसद्वारे १० हजार ८३८ मजुरांना यांच्या इच्छित स्थळी सोडण्यात आले. यादरम्यान, धुळे जिल्ह्यातील दोन बस चालकांना कोरोना विषाणूची लागण झाल्याचे तपासणीअंती निदर्शनास आले. या पार्श्वभूमीवर जिल्हाधिकाऱ्यांनी बस चालकांच्या आरोग्य तपासणीचे आदेश दिले आहेत़ या चालकांनी जीव धोक्यात घालून सेवा बजावली आहे. त्यांच्या आरोग्याची काळजी घेणे हे प्रशासनाचे कर्तव्य आहे. त्यामुळे या चालकांसह त्यांच्या कुटुंबीयांच्या सुरक्षिततेसाठी तत्काळ तपासणी करुन घ्यावी. त्यातून कोणी कोरोना विषाणू पॉझिटिव्ह आढळून आला तर त्यांच्यावर तातडीने उपचार करणे शक्य होईल़

Web Title: Health check up of bus drivers

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.