धुळे : जिल्हाधिकारी कार्यालयात गठित केलेल्या जिल्हास्तरीय गाैण खनिज पथकाने साक्री तालुक्यात शनिवारी चार वाहने पकडून तहसिल कार्यालयात जप्त केली आहेत.जिल्हास्तरीय गाैण खनिज भरारी पथकाचे प्रमुख तथा जिल्हा खनिकर्म अधिकारी किशोर घोडके यांनी सांगितले की, गुजरात राज्यातून उपसा केलेली वाळू मालेगाव, सटाणा आदी ठिकाणी नेली जात असल्याचे भासवून साक्री तालुक्यातील भामेर येथे वाळु विक्री करण्याचा घाट घातला हाेता. परंतु पथकाने केलेल्या चाैकशीत वाळु चोरी सिध्द झाल्याने वाळुची दोन अवजड वाहने भामेर ता. साक्री येथे पकडली. शनिवारी दुपारी १.३० वाजेच्या सुमारासह ही कारवाई करण्यात आली.
दरम्यान, याच पथकाने दुपारी ३ वाजता अंबापूर ता. साक्री गावात दोन ट्रॅक्टर पकडले. या दोन्ही ट्रॅक्टरमधून गाैण खनिजाची चोरटी वाहतूक केली जात होती. एका ट्रॅक्टरमध्ये मुरुम होते तर दुसऱ्या ट्रॅक्टरमध्ये दगड होते. दोन्ही ट्रॅक्टर साक्री तहसिल कार्यालयात जमा करण्यात आली आहेत.
जिल्हास्तरीय गाैण खनिज पथकाचे प्रमुख किशोर घोडके यांच्यासह पंजाबराव साळुंखे, किसन चाैधरी हे दोन पोलीस कर्मचारी,चालक रवींद्र भदाणे यांनी ही कारवाई केली. जप्त केलेल्या वाहनांच्या मालकांकडून नियमानुसार दंड वसूल केला जाणार आहे.