धुळे : कोरोना लसीकरणाचे डोस संपल्याने जिल्ह्यात लस कोंडी निर्माण झाली आहे. लसीकरणाचा तुटवडा निर्माण झाल्याने धुळे शहरातील २० लसीकरण केंद्रांसह ग्रामीण भागातील अनेक केंद्रांवरील लसीकरण गुरुवारी ठप्प झाले होते. आतापर्यंत जिल्ह्यातील १ लाख नागरिकांनी कोरोनाची लस घेतली आहे. ४५ वर्षावरील नागरिकांच्या लसीकरणाला सुरुवात झाली आहे. मात्र पुरेसे डोस प्राप्त न झाल्याने लसीकरण मोहीम थांबवण्याची वेळ जिल्हा आरोग्य विभागावर आली आहे.
जिल्ह्यात ४५ वर्षावरील नागरिकांची संख्या ७ लाख २२ हजार इतकी आहे. आरोग्य विभागाने शासनाकडे ८ लाख डोसची मागणी केली होती. मात्र केवळ ३३ हजार ५०० डोस प्राप्त झाले होते. मागणीच्या तुलनेत अल्प डोस मिळाल्याने आठवडाभरातच डोस संपले आहेत. दरम्यान, कोव्हॅक्सिन लसीचे ८ हजार डोस मंगळवारी प्राप्त झाले होते. ज्यांनी कोव्हॅक्सिनचा पहिला डोस घेतला आहे. अशा नागरिकांना कोव्हॅक्सिनचा डोस दिला जातो आहे. मात्र कोव्हिशिल्डचे डोस उपलब्ध न झाल्याने लसीकरण मोहिमेत खोडा पडला आहे.
प्रतिक्रिया -
महानगरपालिकेच्या २० केंद्रांवर सध्या लसीकरण मोहीम राबविण्यात येत आहे. मात्र कोव्हिशिल्ड लसीचे डोस संपल्याने सर्व केंद्रांवरील लसीकरण गुरुवारी बंद ठेवावे लागले. डोस उपलब्ध झाल्यानंतर लसीकरण मोहीम पूर्ववत सुरू होईल. लस टोचून घेण्यासाठी गुरुवारी लसीकरण केंद्रांवर आलेल्या नागरिकांना त्याबाबत सांगितले आहे.
- डॉ. पल्लवी रवंदळे, लसीकरण प्रमुख मनपा