धुळे आणि नंदुरबार जिल्हा मिळून २०११ पासून तब्बल ३५ हजार ५९८ बांधकाम कामगारांनी नोंदणी केलेली आहे. धुळे जिल्ह्यातील कामगारांची संख्या अंदाजे २० हजारपेक्षा अधिक आहे. परंतु नोंदणीचे नूतनीकरण केलेले कामगार केवळ ६ हजार ३२० च्या आसपास आहेत. सरसकट सर्व नोंदणीकृत कामगारांना मदत मिळाली, तर काही प्रश्न नाही. परंतु नूतनीकरणाचा निकष लावला, तर केवळ ६ हजार ३२० कामगारांना मदत मिळणार आहे. इतर २० हजारपेक्षा अधिक कामगार मदतीपासून वंचित राहू शकतात.
कामगारांना नूतनीकरणाची संधी
जिल्ह्यातील ज्या बांधकाम कामगारांनी २०१९ च्या जून, जुलै, ऑगस्टमध्ये नवीन नोंदणी किंवा नूतनीकरण केले आहे, त्या कामगारांना नूतनीकरण करण्याची संधी आहे. वर्षभरात ९० दिवस काम केल्याचे प्रमाणपत्र सादर करावे लागते. त्यानंतर नवीन नोंदणी किंवा नूतनीकरण होते. २० हजारपैकी १३ ते १४ हजार मजुरांनी नूतनीकरण केले नसल्याने शासनाच्या रेकाॅर्डवर ते कामावर नसल्याचे दिसते. सध्या जिल्ह्यात केवळ ६ हजार ३२० कामगार सक्रिय असल्याची नोंद प्रशासनाकडे आहे.
आमच्या पोटापाण्याचे काय
शासनाने १५ दिवसांचा लाॅकडाऊन जाहीर केल्यामुळे रोजगार बंद झाला आहे. शासनाने १५०० रुपये मदत जाहीर केली असली, तरी त्यातून घरभाडे द्यायचे की किराणा माल भरायचा, असा प्रश्न पडला आहे. - विठ्ठल मोरे, बांधकाम मजूर
संचारबंदी जाहीर करून शासनाने मदतही जाहीर केली. लाॅकडाऊन सुरू झाले; पण मदत कधी मिळणार, असा प्रश्न आहे. प्रशासनाशी संपर्क केला, तर जीआर आला नसल्याचे सांगण्यात आले. - गजानन गिरासे, बांधकाम मजूर
मागीलवर्षीचा अनुभव फार वाईट आहे. लाॅकडाऊन जाहीर होते, मदतीची घोषणाही होते; परंतु मदत मात्र लाॅकडाऊन संपल्यावर मिळते. जो आधार लाॅकडाऊनमध्ये मिळायला हवा, तो मिळत नाही. - बालाजी अहिरे, बांधकाम मजूर