सोनारी येये आढावा बैठक

सोनारी : जिल्हा परिषदेकडून ‘स्मार्ट गाव’ या योजनेचे नाव बदलून आर. आर. (आबा) पाटील सुंदर गाव योजना करण्यात आली आहे. या योजनेअंतर्गत दिल्या जाणाऱ्या ‘तालुका स्मार्ट ग्राम’ पुरस्कारासाठी परंडा तालुक्यातील सोनारी या गावाची निवड करण्यात आली असून, या अनुषंगाने बुधवारी मुख्य कार्यकारी अधिकारी राहूल गुप्ता यांनी येथे भेट देऊन आढावा बैठक घेतली.

गुप्ता यांनी या भेटीदरम्यान जि. प. शाळा, ग्रामपंचायत कार्यालयाची पाहणी केली. तसेच भैरवनाथ मंदिर, भैरवनाथ गुरु गादी मठ, गावाबाहेर असलेल्या पुरातन लहूबाई तीर्थकुंड व तेथे चालू असलेल्या मंदिर व सभामंडप बांधकामाला भेट दिली. यानंतर प्राथमिक आरोग्य केंद्राचे तीन वर्षापासून चालू असलेल्या कामाची देखील पाहणी करण्यात आली. सन २०२०-२१ सुंदर गाव योजनेत ८१ गुण प्राप्त करून परंडा तालुक्यातून सोनारी गावाने पहिला क्रमांक मिळविला आहे. या सुंदरगाव पुरस्काराने सोनारी गावाला दहा लाखांचे बक्षीस देखील मिळणार आहे. या माध्यमातून गावाच्या विकासासाठी तसेच विविध योजनांच्या माध्यमातून नागरिकांसाठी २६४ वैयक्तिक लाभाची कामे करता येणार आहेत.

यावेळी जि. प. उपाध्यक्ष धनंजय सावंत, उपमुख्य कार्यकारी अधिकारी नितीन दाताळ, मुख्य लेखा व वित्त अधिकारी केंद्रे, कार्यकारी अभियंता नितीन भोसले, जिल्हा कृषी अधिकारी तीर्थकर, कार्यकारी अभियंता देवकर, प्रभारी गटविकास अधिकारी बी. आर. ढवळशंख, विस्ताराधिकारी ए. सी. कावळे, उप अभियंता लांडे, उपअभियंता शिंदे यांच्यासह इतर अधिकारी, कर्मचारी, सरपंच दीपक दुबळे, उपसरपंच परमेश्वर मांडवे, ग्रामसेवक मदने, ग्रा. पं. सदस्य, जि. प. शाळेचे शिक्षक व ग्रामस्थ उपस्थित होते.

चौकट...

नागरिकांमध्ये जनजागृती करा

सुंदरगाव योजनेत गावाची निवड झाल्याने मनरेगामधून फळबाग लागवड, गाय गोठा, कुक्कुटपालन अशाप्रकारे एकूण २६४ वैयक्तिक लाभाची कामे करता येणार आहेत. त्यामुळे सरपंच, ग्रामसेवक यांनी गावातील नागरिकांमध्ये योजनेची जनजागृती करुन वैयक्तिक लाभासाठी नागरिकांना प्रोत्साहन देण्याचे आदेश मुख्य कार्यकारी अधिकारी गुप्ता यांनी बैठकीदरम्यान दिले.

निधीची मागणी

भैरवनाथ मंदिर ‘ब’ दर्जाचे तीर्थक्षेत्र असल्याने मंदिर परिसर व गावातील विविध ठिकाणी विकास कामे व सुविधा उपलब्ध करून देण्यासंदर्भात निधी उपलब्ध करण्याची मागणी जि. प. उपाध्यक्ष धनंजय सावंत यांनी मुख्य कार्यकारी अधिकारी राहुल गुप्ता यांच्याकडे बैठकीदरम्यान केली.