लोहारा : लोहारा येथे नवीन एमआयडीसीची निर्मिती करावी, अशी मागणी राष्ट्रवादी काँग्रेसचे जिल्हा उपाध्यक्ष अनिल जगताप यांनी जिल्हाधिकाऱ्यांमार्फत राज्याचे उद्योगमंत्री सुभाष देसाई यांच्याकडे निवेदनाद्वारे केली आहे, तसेच महिनाभरात मंजुरी न मिळाल्यास आंदोलनाचा इशाराही त्यांनी दिला आहे.
निवेदनात म्हटले आहे, लोहारा तालुक्याची निर्मिती सन १९९९ झाली असून, या तालुक्यात ४७ गावे व ४४ ग्रामपंचायती आहेत. तालुक्याचे एकूण मतदान ९५ हजार इतके असून, तालुक्याची लोकसंख्या १ लाख २५ हजार आहे. तालुक्यात जमिनीचे एकूण क्षेत्र ५४ हजार हेक्टर इतके असून, लागवडी योग्य क्षेत्र ४८ हजार हेक्टर आहे. जमिनीचे क्षेत्र कमी व लोकसंख्या जास्त अशी स्थिती असून, तालुक्यात एक खासगी साखर कारखाना वगळता, इतर कुठलाही मोठा उद्योग धंदा नसल्याने केवळ शेतीवरच अवलंबून राहावे लागत आहे. शेतीही बेभरवशाची व अल्प उत्पन्नाची झाल्याने नागरिकांची आर्थिक कुचंबणा होत आहे.
नीति आयोगाने जाहीर केल्याप्रमाणे उस्मानाबाद जिल्हा संपूर्ण भारतात क्रमांक दोनचा मागासलेला जिल्हा म्हणून ओळखला जातो. त्यात लोहारा तालुक्याचे दरडोई उत्पन्न व वार्षिक उत्पन्न अत्यंत कमी आहे. त्यामुळे या ठिकाणी रोजगाराच्या सोयी उपलब्ध होणे गरजेचे आहे. रोजगाराच्या निमित्ताने या तालुक्यातील नागरिक व युवक पुणे-मुंबई येथे राहतात. त्यामुळे त्यांना या तालुक्यात रोजगार उपलब्ध होणे अत्यंत गरजेचे आहे. या तालुक्यात एमआयडीसीची निर्मिती झाल्यास, अनेक नवीन उद्योजकही निर्माण होतील. यासाठी येथे नवीन एमआयडीसी निर्माण करून, या तालुक्यातील युवकांना रोजगाराच्या संधी उपलब्ध करून द्याव्यात, अशी मागणी निवेदनात करण्यात आली आहे.