कोरोना लसीकरण मोहिमेचा प्रारंभ

भूम : येथील ग्रामीण रुग्णालयाच्यावतीने जंतनाशक औषध वाटप व कोरोना लसीकरण मोहिमेचा प्रारंभ करण्यात आला. वैद्यकीय अधीक्षक संदीप जोगदंड व तालुका वैद्यकीय अधिकारी अमोल शिंगारे यांनी १ मार्चपासून जंतनाशक औषध वाटपाची मोहीम सुरू केली असून, ती ८ मार्चपर्यंत सुरू राहणार आहे. ०१ ते १९ वर्ष वयोगटातील मुला-मुलींनी ही जंतनाशक गोळी घ्यावी, असे आवाहन ग्रामीण रुग्णालयाकडून करण्यात आले आहे. दरम्यान, शहरातील खासगी व शासकीय शाळेतील विद्यार्थ्यांनाही जंतनाशक गोळ्या दिल्या जात आहेत. मात्र, ०१ ते १० वर्ष वयोगटातील विद्यार्थ्यांची शाळा सुरू नसल्याने प्रभागनिहाय कर्मचारी नेमून प्रत्येक विद्यार्थ्याच्या घरी जंतनाशक गोळ्या पोहोच केल्या जात असल्याची माहिती वैद्यकीय अधीक्षक संदीप जोगदंड यांनी दिली.

दरम्यान, १ मार्चपासून ६० वर्षांवरील नागरिकांना कोरोना लसीकरण मोहीम सुरू करण्यात आली असून, आजवर १,५६० नागरिकांना लसीकरण करण्यात आले आहे. यातील एकाही नागरिकाला कसलाही त्रास झालेला नसल्याचेही डॉ. जोगदंड यांनी सांगितले.