कोरेगाववाडीच्या विकासाचा रोटरी क्लबने घेतला वसा

उमरगा : येथील रोटरी क्लबने इंटिग्रेटेड व्हिलेज डेव्हलपमेंट अंतर्गत उमरगा तालुक्यातील कोरेगाववाडी हे गाव संपूर्ण विकासासाठी दत्तक घेतले आहे. कोरेगाववाडी ग्रामपंचायत सदस्य व ग्रामस्थ यांच्यासोबत सोमवारी या अनुषंगाने बैठक घेण्यात आली. या बैठकीमध्ये गावातील समस्यांसंदर्भात चर्चा करण्यात आली.

यामध्ये प्रामुख्याने स्वच्छता अभियान, वृक्षारोपण, गावातील पाण्याचा प्रश्न, ग्रामपंचायत कार्यालयातील अत्यावश्यक सुविधा, मंदिर सुशोभिकरण, वाचनालय, ग्रंथालय, घाण पाणी वाहून नेणाऱ्या जलवाहिन्या, नाला सरळीकरण इत्यादी कामांसाठी सर्वतोपरी मदत करण्याचे आश्वासन रोटरी क्लबच्यावतीने देण्यात आले. त्याचबरोबर लोकांच्या सहकार्याची अपेक्षाही व्यक्त करण्यात आली. यावेळी गावातील माजी सरपंच नागनाथ कुंभार यांनी मनोगत व्यक्त केले. यावेळी प्रा. राम सोलंकर, सोलंकर गुरुजी, होगले गुरुजी, बाजीराव किसवे, ग्रामपंचायत सदस्य व ग्रामस्थ मोठ्या संख्येने उपस्थित होते. दरम्यान, ग्रामस्थांच्यावतीने रोटरी क्लबचे अध्यक्ष डॉ. पंडित बुटुकणे, सचिव व्यंकट गुंजोटे, इंटिग्रेटेड व्हिलेज डायरेक्टर डॉ. विनोद देवकर, क्लब ट्रेनर डॉ. संजय अस्वले, रोटेरियन सतीश साळुंके, युसुफ मुल्ला, शमीम पठाण, अनिल मदनसुरे यांचा सत्कार करण्यात आला. सूत्रसंचालन प्राध्यापक राम सोलंकर यांनी केले तर आभार विठ्ठल माने यांनी मानले.