धाराशिव - राष्ट्रवादी काँग्रेसचे आमदार रोहित पवार यांनी मराठवाडा दौऱ्याला सुरुवात केली आहे. धाराशिव मतदारसंघातून त्यांनी आता आपला दौरा सुरू केला असून संभाजीनगरमध्येही ते राष्ट्रवादीचे सर्वेसर्वा शरद पवार यांचा संदेश घेऊन पोहोचत आहेत. रोहित पवारांनी धाराशिव दौऱ्यात जिल्ह्याचे पालकमंत्री तानाजी सावंत यांच्यावर नाव न घेता टीका केली. तसेच, कोरोना काळात ते राज्याचे आरोग्यमंत्री नव्हते, याचं समाधान असल्याचंही ते म्हणाले. पवार यांनी तानाजी सावंत यांच्या खेकडा आणि हाफकिन या विधानावरुन टीका केलीय.
तानाजी सावंत यांनी खेडक्यामुळे धरण फुटल्याचं विधान केलं होतं. विशेष म्हणजे या विधानाचं त्यांनी स्पष्टीकरणही दिलं होतं. तर, हाफकीन इंस्टीट्यूटबद्दलचेही त्यांचे विधान खूप गाजले होते. त्यानंतर, त्यांच्यावर टीकाही झाली होती. धाराशिवमध्ये रोहित पवार यांनी या दोन्ही विधानांचा उल्लेख करत सावंत यांच्यावर नाव न घेता टीका केली.
''खेकड्याला खाज खूप असते, खेकडा जेव्हा खायचा असतो तेव्हा त्याची खाज उतरावी लागते. म्हणजे ती खाज आपल्याला येत नाही, असे म्हणत रोहित पवार यांनी तानाजी सावंत यांचे नाव न घेता त्यांच्यावर निशाणा साधला. खेकड्याची उपमा देत त्यांनी सावंत यांना खोचक टोमणे लगावले. अधिवेशनामध्ये भाषण करत असताना, एक तर ते काय भाषण करतात हे कळत नाही. कोरोना काळात ते आरोग्यमंत्री नव्हते या गोष्टीचं समाधान आहे. ते जर कोरोना कालावधीत मंत्री असते. बाबा.. बा..बा... काय झालं असतं, असा खोचक टोलाही रोहित पवार यांनी लगावला. तर, आता खऱ्या अर्थाने हाफकिंगला बोलावण्याची वेळ आलीय, असेही त्यांनी म्हटले.
घेऊन येतोय साहेबांचा संदेश असे म्हणत रोहित पवार यांनी मराठवाडा दौऱ्याला सुरुवात केली आहे. पहिल्यादिवशी धाराशिव आणि बीड दौरा केल्यानंतर आज ते लातूरमध्ये जात आहेत. लातूरुनंतर संभाजीनगर येथे त्यांचे दौरे होणार आहेत. या दौऱ्यात रोहित पवार राष्ट्रवादीच्या कार्यकर्त्यांशी संवाद साधत आहेत. बैठकांचेही आयोजन करण्यात येत आहे. तसेच, येथील कार्यक्रमात भाषण करताना सत्ताधारी पक्षाच्या नेत्यांवर टीकाही करताना दिसून येतात.