उत्तर प्रदेशातील मिर्झापूर जिल्ह्यातील (Mirzapur Uttar Pradesh) मडिहान येथून एक धक्कादायक घटना समोर आली आहे. येथे लिव्ह इन रिलेशनशिपमध्ये (Live in relationship) राहणाऱ्या एका प्रियकराने प्रेयसीसमोरच स्वतःवर गोळी झाडून आत्महत्या (suicide) केली. याप्रकरणी पोलिसांनी प्रेयसीला अटक केली असून तिची चौकशी सुरू आहे. प्रेयसीने प्रियकराला कुण्या दुसऱ्या महिलेसोबत असल्याची माहिती मिळाल्यावरून, गुन्हा दाखल करण्याची धमकी दिली होती. यानंतर प्रियकरानेही स्वतःच्या डोक्याला पिस्तुल लावत तिला पोलीस ठाण्यात न जाण्याची धमकी दिली होती, असे समजते.
मिळालेल्या माहितीनुसर, ही धक्कादायक घटना मडिहान पोलीस ठाण्याच्या हद्दीतील रैकरा गावात घडली. रामविलास बिंद, असे या प्रियकर युवकाचे नाव आहे. तो गोल्या दोन वर्षांपासून आपल्या प्रेयसीसोबत लिव्ह इनमध्ये राहत होता. बिंदने घरापासून सुमारे 250 मीटर अंतरावर आपल्या प्रेयसीसमोरच स्वत:वर गोळी झाडून आत्महत्या केली. रामविलास बिंद सोबत गाडीत कुणी महिला असल्याची माहिती प्रेयसीला मिळाली होती. यावरून दोघांमध्ये जोरदार वाद झाला होता.
भांडणादरम्यान, संबंधित प्रेयसीने प्रियकराला मदिहान पोलीस ठाण्यात जाऊन तक्रार देण्याची धमकी दिली. यानंतर ती बाहेर पडली. यावर, तिला समजावण्यासाठी रामविलासही आपली कार घेऊन तिच्या मागे निघाला. घरापासून सुमारे अडीचशे मीटर अंतरावर गेल्यानंतर, तो कारमधून खाली उतरला आणि प्रेयसीसमोर जाऊन तिला समजावण्याचा प्रयत्न करू लागला. पण प्रेयसी ऐकायला तयार नव्हती. यानंतर रामविलासने आपल्या जवळील अैध पिस्तुल डोक्याला लावूनही तिला स्वत:वर गोळी झाडण्याची धमकी दिली. मात्र, तरीही ती ऐकायला तयार नव्हती.
यानंतर, अखेर रामविलासने प्रेयसी समोरच स्वतःवर गोळी झाडून आत्महत्या केली. यानंतर घटनेची माहिती मिळताच ठाणेदार शैलेश राय घटनास्थळी पोहोचले. त्यांनी संबंधित पिस्तूल ताब्यात घेतले आणि मृतदेह शवविच्छेदनासाठी पाठवला. तसेच मृतदेहाजवळच रडत असलेल्या प्रेयसीलाही पोलिसांनी ताब्यात घेतले.