रस्त्यात अडविले, मारहाण केली अन् मोबाईल घेऊन पसार झाले....; दोन संशयित युवक ताब्यात

याप्रकरणी रामानंदनगर पोलीस ठाण्यात गुन्ह्याची नोंद झाली असून दोन जणांना ताब्यात घेतले आहे.

जळगाव : शहरातील महाबळ परिसरातील छत्रपती संभाजी राजे नाट्यगृहाजवळील रस्त्यावर एका प्रौढाचा चोरट्याने मोबाईल लांबविल्याची घटना गुरूवारी दुपारी ४.१५ वाजेच्या सुमारास घडली. याप्रकरणी रामानंदनगर पोलीस ठाण्यात गुन्ह्याची नोंद झाली असून दोन जणांना ताब्यात घेतले आहे.

जळगाव शहरातील इंद्रनिल सोसायटी येथे नितीन रमेश सोनवणे हे वास्तव्यास आहेत. ते गुरुवारी दुपारी छत्रपती संभाजी नाट्यगृहाजवळील संभाजी राजे नाट्यगृह परिसरात आले होते. दोन युवकांनी त्यांना मारहाण करून त्यांच्याजवळील १० हजार रूपये किंमतीचा मोबाईल हिसकावून तेथून पळ काढला. 

सोनवणे यांनी लागलीच रामानंदनगर पोलिस ठाणे गाठून संपूर्ण प्रकार पोलिसांना सांगितला. त्यानंतर पोलिसांनी दोन जणांना ताब्यात घेतले आहेत. सोनवणे यांच्या तक्रारीवरून त्या दोन्ही युवकांविरूध्द गुन्ह्याची नोंद करण्यात आली आहे. पुढील तपास पोलीस उपनिरिक्षक गोपाल देशमुख हे करीत आहेत.