गाणी ऐकण्यापासून रोखताच मुलगा बनला राक्षस; जन्मदात्या आईलाच संपवले, त्यानंतर मृतदेह...

जेव्हा छोटा मुलगा घरी परतला त्याने आईबाबत विचारणा केली. मात्र मोठ्या भावाने काहीच उत्तर दिले नाही.

कानपूरच्या रावतपूर येथे १२ वीत शिकणाऱ्या मुलाने गाणी ऐकण्यापासून रोखल्यामुळे त्याच्या आईचीच हत्या केली आहे. त्यानंतर आईचा मृतदेह बेडीमध्ये टाकला. लहान मुलगा बाहेरून घरी परतला तेव्हा हा प्रकार समोर आला. या घटनेने परिसरात खळबळ उडाली आहे. मोठ्या मुलाने ओढणीने आईचा गळा दाबून तिची हत्या केली आणि त्यानतर मृतदेह बेडखालील स्टोरेजमध्ये ठेवला. मृत महिलेचा छोटा मुलगा शाळेतून परतला आणि त्याने आईचा शोध घेतला. मोठ्या भावाला आईबाबत विचारणा केली त्यानेही काही उत्तर दिले नाही. खूप शोधल्यानंतरही आई त्याला सापडली नाही. त्याचवेळी बेडचा एक भाग थोडा वर आल्याचे पाहिले त्यानंतर बेड उघडला तेव्हा आईचा मृतदेह पाहून त्याला धक्का बसला. 

आईचा मृतदेह पाहताच छोटा मुलगा किंचाळला. त्यानंतर आसपासचे लोकही जमा झाले. महिलेचा श्वास सुरू होता त्यामुळे गोंधळात महिलेला हॉस्पिटलला पाठवले. स्थानिकांनी पोलिसांना या घटनेची माहिती दिली. महिलेला हॉस्पिटलला नेले परंतु डॉक्टरांनी तिला मृत घोषित केले. आतापर्यंत केलेल्या तपासात रागाच्या भरात मोठ्या मुलाने आईचा खून केल्याचे समोर आले. माहितीनुसार, रावतपूर येथे ऊर्मिला राजपूत या एका व्यक्तीसोबत लिव्ह इनमध्ये राहत होत्या. त्यांच्यासोबत २ मुलेही होती. ऊर्मिला यांच्या पहिल्या पतीचा मुलगा जो १२ वीचे शिक्षण घेत आहे तर दुसरा मुलगा १० वीत शिकतो. आईने दोन्ही मुलांना घरातील कामांचे वाटप केले होते. मंगळवारी छोटा मुलगा शाळेत गेला होता. त्यावेळी मोठ्या मुलाला आईने भांडी घासायला सांगत स्वत: बीपीची गोळी घेऊन झोपायला गेली. 

त्याचवेळी मुलगा मोठ्या आवाजात गाणी ऐकत होता. ऊर्मिला यांची तब्येत बिघडली होती त्यामुळे त्यांनी मुलाला गाणी बंद करण्यास सांगितले. मुलाने ऐकले नाही म्हणून चिडलेल्या आईने गाण्याचा स्पीकर मोडून टाकला. या प्रकाराचा मुलालाही राग आला. त्याने आईला जोरात धक्का दिला. या धक्क्यामुळे आई जमिनीवर खाली पडली आणि तिच्या नाकाला दुखापत झाली. त्यात घाबरलेल्या मुलाने आई हा प्रकार सर्वांना सांगेत यामुळे त्याने ओढणीने आईचा गळा दाबून हत्या केली. त्यानंतर आईचा मृतदेह लपवण्यासाठी त्याने बेडचा वापर केला असं पोलीस अधीक्षक रंजीत कुमार यांनी सांगितले. 

दरम्यान, जेव्हा छोटा मुलगा घरी परतला त्याने आईबाबत विचारणा केली. मात्र मोठ्या भावाने काहीच उत्तर दिले नाही. त्यानंतर त्याला बेडमध्ये लपवलेला आईचा मृतदेह दिसला तेव्हा आईचा श्वास सुरू होता. त्याने स्थानिकांच्या मदतीने आईला हॉस्पिटलला नेले. या घटनेची माहिती पोलिसांनाही कळवली. हॉस्पिटलमध्ये पोहचताच डॉक्टरांनी महिलेला मृत घोषित केले. रागाच्या भरात आईचा खून केल्याचे मोठ्या मुलाने पोलिसांसमोर कबूल केले. मात्र ऊर्मिलाचे वजन ९० किलो होते, एका १२ वीच्या विद्यार्थ्याला इतक्या वजनाचे शरीर एकट्याने बेडमध्ये टाकणे शक्य आहे का, या हत्येत ऊर्मिलासोबत लिव्ह इनमध्ये राहणाराही सहभागी आहे का याबाबत पोलीस तपास करत आहे.