शेतीच्या वादातून जन्मदात्या आईचा खून; मुलासह सून, व्याही पोलिसांच्या जाळ्यात अडकले

शेतीच्या वहिवाटीवरून मयत महिला, तिचा मुलगा आणि सून यांच्यात वारंवार वाद होत असल्याचे आत्या आणि तिच्या मुलीने फिर्यादीला सांगितले होते

सोलापूर - शेतीच्या वहिवाटीच्या कारणावरून जन्मदात्या वृद्ध आईची मुलगा, सून व व्याहीने मिळून संगनमताने हत्या केल्याची धक्कादायक घटना ३० मे रोजी रात्री ९.३० च्या सुमारास घडली आहे. माढा तालुक्यातील मुंगशी येथील हा प्रकार आहे. इथं लक्ष्मी महाडिक असं खून झालेल्या वृद्ध महिलेचे नाव आहे. या प्रकरणी मारूती रेवडे यांनी दिलेल्या फिर्यादीवरून मुलगा दत्तात्रय महाडिक, सून रजनी महाडिक, व्याही धर्मराज बागल यांच्यावर गुन्हा दाखल झाला असून तिघांना पोलिसांनी ताब्यात घेतले आहे.

मयत वृद्ध महिला फिर्यादीची आत्या असून तिला गावात ८ एकर शेतजमीन आहे. फिर्यादीच्या मयत आत्याला एक मुलगा आणि मुलगी आहे. मुलगी कल्पना ढेरे विवाहित असून सध्या ती ऑस्ट्रिया देशात नोकरीनिमित्त वास्तव्यास आहे. मयताच्या पतीचेही १० महिन्यापूर्वी निधन झाले आहे. आरोपी मुलगा आणि सून हे दोघे पक्क्या घरात राहतात तर मयत महिलेचे सुनेशी पटत नसल्या कारणाने घराशेजारीच एका पत्र्याच्या शेडमध्ये ती राहत होती. 

शेतीच्या वहिवाटीवरून मयत महिला, तिचा मुलगा आणि सून यांच्यात वारंवार वाद होत असल्याचे आत्या आणि तिच्या मुलीने फिर्यादीला सांगितले होते. सहा महिन्यांपूर्वी आरोपी मुलगा, सून आणि तिचे वडील शेतीच्या वहिवाटीच्या कारणावरून ऊसाच्या सरीत महिलेला मारहाण केली होती. फिर्यादीला ऑस्ट्रियात राहणाऱ्या मयत महिलेच्या मुलीचा व्हॉट्सअप कॉल आला होता. तिने सांगितले की, माझ्या आईला शेतामध्ये मारून टाकले आहे. तू जाऊन बघ, मग फिर्यादी अनाळा येथून मुंगशी येथे आत्या लक्ष्मी यांच्या घरी रात्री ११ वाजता आला. मयताच्या घराजवळ लोक जमले होते. उसाच्या शेतामध्ये जाऊन पाहिले असता सरीमध्ये लक्ष्मी रक्ताच्या थारोळ्यात जखमी अवस्थेत पडली होती. 

दरम्यान, गंभीर जखमी असलेल्या महिलेच्या डोक्यातून रक्त येत होते. तिचा गळा कपड्याने आवळलेला होता. तोंडावर, डोक्यात दगडाने मारून तिला जिवे मारले होते असं फिर्यादीने पोलिसांना दिलेल्या तक्रारीत म्हटलं आहे.  सध्या पोलीस या घटनेचा तपास करत आहेत.