प्रेमात आणि युद्धात सारं काही माफ असतं, असं म्हणतात. पण, याच प्रेमाचा नाद आता एका तरुणाच्या जीवावर बेतला आहे. प्रेमात नकार पचवण्याची क्षमता नसलेल्या एका तरुणाने आपल्या गर्लफ्रेंडच्या घरावर थेट ग्रेनेड बॉम्ब फेकला. मात्र, या घटनेत त्याच्या गर्लफ्रेंडचा जीव वाचला आणि तरुणाचाच मृत्यू झाला आहे. ही धक्कादायक घटना थायलंडमध्ये घडली आहे.
गर्लफ्रेंडने दिला नकार!
थायलंडमध्ये राहणाऱ्या एका ३५ वर्षीय तरुणाने आपल्या माजी प्रेयसीच्या घरी जाऊन, पुन्हा एकदा नात्याला संधी देण्याची मागणी केली. मात्र, त्याच्या माजी प्रेयसीने यासाठी थेट नकार दिला. तिचा नकार ऐकताच तरुणाचा संताप अनावर झाला आणि त्याने मनात एक मोठी योजना तयार केली. त्याने गर्लफ्रेंडच्या घरावर ग्रेनेड बॉम्ब फेकला.
बँकॉक पोस्टच्या रिपोर्टनुसार, ही घटना २५ मे रोजी थायलंडच्या चाना जिल्ह्यात घडली आहे. या ग्रेनेड स्फोटात ३५ वर्षांच्या सुरपोंग थोंगनाक याचा मृत्यू झाला असून, चार लोक गंभीर जखमी झाले आहेत. पोलिसांनी या घटनेची माहिती स्थानिक माध्यमांना दिली. सुरपोंग हा त्याच्या माजी गर्लफ्रेंडच्या घरी त्यांच्या नात्याला आणखी एक संधी द्यावी, अशी विनंती करण्यासाठी गेला होता. मात्र, तिने नकार देताच याचा राग अनावर झाला.
कैचीने हल्ला करण्याचा प्रयत्न केला
चिडलेल्या सुरपोंगने माजी प्रेयसीवर कैचीने हल्ला करण्याचा प्रयत्न केला. मात्र, उपस्थित लोकांनी मध्यस्थी करून त्याला रोखलं. यानंतर सुरपोंग आपल्या गाडीच्या दिशेने गेला आणि त्याने गाडीतून एम २६ फ्रेगमेंटेशन ग्रेनेड बाहेर काढला. त्याची पीन काढून त्याने तो बॉम्ब त्याला थांबवणाऱ्या लोकांकडे भिरकवला. मात्र, पहिल्या प्रयत्नात त्याचा स्फोट झाला नाही. म्हणून सुरपोंगने तो बॉम्ब उचलला. मात्र, त्याने उचलताच त्याच्या हातातच बॉम्बकहा स्फोट झाला.
गर्लफ्रेंड थोडक्यात बाचावली
या स्फोटामुळे आजूबाजूला उभ्या असणाऱ्या गाड्यांचे देखील मोठे नुकसान झाले. पोलीस आणि मेडिकल टीम घटनास्थळी पोहोचली तेव्हा सुरपोंग रक्ताच्या थारोळ्यात पडला होता. त्याला वाचवण्याचा प्रयत्न केला गेला, मात्र तो निष्फळ ठरला. या घटनेत दोन पुरुष आणि दोन महिला जखमी झाल्या आहेत. या स्फोटादरम्यान सुरपोंगची माजी प्रेयसी घरात निघून गेल्याने, थोडक्यात बचावली.