Sheetal Chaudhary Haryana: हरयाणातील मॉडेल शीतल चौधरीचा अपघाती मृत्यू झाला नसून तिची हत्या करण्यात आल्याचे पोलीस तपासातून उघड झाले. पोलिसांनी या प्रकरणी शीतलचा बॉयफ्रेंड सुनीला अटक केली आहे. हरयाणातील सोनीपत जिल्ह्यात असलेल्या खरखौदा परिसरात एका कालव्यात शीतलचा मृतदेह सापडला होता. पोलिसांनी सुनीलची चौकशी केली. त्याने आमचा अपघात झाल्याचे आणि शीतलचा मृत्यू झाल्याचे सांगितले, पण नंतर सगळं बिंग फुटले.
'लोकमत'चं WhatsApp चॅनल फॉलो करा!
मॉडेल शीतल चौधरी म्युझिक अल्बममध्ये काम करायची आणि पानीपतमध्ये तिच्या बहिणीसोबत राहत होती. ती १४ जून रोजी शुटिंगसाठी घरातून बाहेर पडली होती, पण परत आलीच नाही.
वाचा >>कोल्हापुरात गॅस गिझरच्या गळतीमुळे नवदाम्पत्याचा गुदमरून मृत्यू, पोलिस तपास सुरु
तिच्या नातेवाईकांनी पानीपत पोलीस ठाण्यात बेपत्ता झाल्याची तक्रार दिली. सोनीपत पोलीस ठाण्यातील एका अधिकाऱ्याने सांगितले की, 'पोलिसांना रविवारी रात्री उशिरा माहिती मिळाली की, एका तरुणीचा मृतदेह कालव्यामध्ये मिळाला आहे. मृतदेह ताब्यात घेऊन ओळख पटवण्यात आली, तो मृतदेह शीतलचा असल्याचे स्पष्ट झाले. शीतल बेपत्ता असल्याची तक्रार पानीपत पोलीस ठाण्यात नोंदवण्यात आली होती.'
सुनीलने केला अपघाताचा बनाव
सुनील हा शीतलचा बॉयफ्रेंड आहे. सुनीलने शीतलचा मृत्यू अपघातात झाला, असा बनाव रचला होता. पण, नंतर त्याचे बिंग फुटले.
शीतलच्या बहिणीने पोलिसांना सांगितले की, शनिवारी रात्री दीड वाजता शीतलने मला व्हॉट्सअपवर व्हिडीओ कॉल केला होता. तिने सांगितले की, सुनील मारहाण करत आहे. त्यानंतर शीतलचा मोबाईल स्वीच ऑफ येऊ लागला.
कालव्याजवळ सापडली सुनीलची कार
रविवारी सकाळी पानीपत जवळ असलेल्या एका कालव्याजवळ सुनीलची कार मिळाली. पण, शीतलबद्दल काहीही कळू शकले नाही. त्यानंतर सोमवारी शीतलचा मृतदेह सोनीपतजवळील खरखौदामध्ये कालव्यात मिळाला. कार मिळालेल्या ठिकाणापासून ८० किमी दूर शीतलचा मृतदेह वाहून गेला होता. छाती आणि हातावरील टॅटूवरून शीतलची ओळख पटली.
सुनील रुग्णालयात झाला दाखल
शीतलची हत्या केल्यानंतर सुनीलने अपघात झाल्याचे दाखवण्याचा बनाव केला. तो पानीपतमधील एका रुग्णालयात दाखल झाला. पोलिसांना तो तिथे असल्याचे कळले. पोलिसांनी चौकशी केल्यावर त्याने सांगितले की, गाडी कालव्यात कोसळली होती. पण, पोलिसी खाक्या दाखवताच त्याने शीतलची हत्या केल्याचे कबूल केले.
सुनील विवाहित आहे आणि त्याला दोन मुलंही आहेत. त्यामुळेच शीतलने त्याच्यासोबतचे नाते तोडले होते. पण, तरीही तो शीतलचा पिच्छा सोडत नव्हता. त्यातूनच त्याने शीतलला संपवले. शीतलच्या मृतदेहावर खूणा आढळून आल्या आहेत. सुनीलने चाकूने शीतलवर वार केले. शीतल ६ वर्षांपासून सुनीलला ओळखत होती. पूर्वी ती कर्नालमध्ये सुनीलच्याच हॉटेलवर नोकरी करायची.