जळगाव - खिशात ठेवलेला चष्मा डोळ्यांना लावताच काम फत्ते झाले या गोपनीय कृतीप्रमाणे लाचलुचपत प्रतिबंधक विभागाच्या पथकाने मनपाचा चौकीदार विलास भिका पाटील (५५) याला चार हजार रुपयांची लाच स्विकारताना मंगळवारी दुपारी रंगेहाथ पकडण्यात आले. रामानंद नगरातील गिरणा पाण्याच्या टाकीजवळील मनपाच्या कार्यालयात हा सापळा रचण्यात आला. दरम्यान, विलास पाटील याला अटक करण्यात आली असून रामानंद नगर पोलीस स्टेशनला गुन्हा दाखल करण्यात आला आहे.
सूत्रांनी दिलेल्या माहितीनुसार, तक्रारदार यांचा पिंप्राळा परीसरात दुकान (गाळा) असून या दुकानाचा कर कमी करण्याच्या मोबदल्यात विलास पाटील याने तक्रारदाराकहे चार हजार रुपयांची लाच मागितली होती. त्यामुळे पाटील यांनी लाचलुचपत प्रतिबंधक विभागाकडे तक्रार केली. उपअधीक्षक जी.एम.ठाकूर यांनी तक्रारीची पडताळणी केली. त्यानंतर मंगळवारी दुपारी रामानंद नगरातील गिरणा पाण्याच्या टाकीजवळ सापळा लावला होता.
आरोपीने ही रक्कम स्विकारली की नाही याबाबत प्रत्येक वेळी सांकेतिक शब्द किंवा कृतीचा वापर केला जातो. आजच्या कारवाईत तक्रारदाराने खिशात चष्मा ठेवायचा. आरोपीने पैसे स्विकारले तर चष्मा डोळ्यांना लावायचा, नाही स्विकारली तर चष्मा लावायचा नाही असे ठरले होते. विलास पाटील याने चष्मा लावताच उपअधीक्षक जी.एम.ठाकुर, निरीक्षक निलेश लोधी, संजोग बच्छाव, कर्मचारी मनोज जोशी, प्रशांत ठाकुर, प्रविण पाटील, नासिर देशमुख, ईश्वर धनगर, व सुरेश पाटील यांनी त्याला रंगेहाथ पकडले. जागेवरच पंचासमक्ष पंचनामा करुन पाटील याला अटक करण्यात आली.