नवी दिल्ली - पंजाबच्या कपूरथलामध्ये माणुसकीला काळीमा फासणारी एक घटना घडली आहे. सात वर्षांच्या मुलीवर बलात्कार केल्याची भयंकर घटना समोर आली आहे. धक्कादायक बाब म्हणजे चिमुकलीला बिस्किटाचे आमिष दाखवून तिच्यावर बलात्कार करण्यात आला आहे. सध्या तिची प्रकृती अत्यंत गंभीर आहे. मुलीवर मंगळवारी सकाळी अमृतसरच्या मेडिकल कॉलेजमध्ये शस्त्रक्रिया करण्यात आली. डॉक्टरांनी शर्थीचे प्रयत्न करून मुलीचा जीव वाचवला आहे. मुलीची प्रकृती आता स्थिर असल्याची माहिती मिळत आहे.
पोलिसांनी दिलेल्या माहितीनुसार, या प्रकरणातील आरोपीला अटक करण्यात आली आहे. त्याच्याविरोधात विविध कलमान्वये गुन्हे दाखल करण्यात आले आहेत. कपूरथला सुलतानपूर लोधी मार्गावर सोमवारी दुपारी हुसैनपूरमध्ये झोपडीत राहणाऱ्या 26 वर्षीय आरोपीने सात वर्षीय मुलीवर बलात्कार केला. घटना घडली त्यावेळी मुलीचे आईवडील हे कामासाठी बाहेर गेले होते. आरोपीने मुलीला बिस्किटाचे आमिष दाखवून तिच्यावर बलात्कार केला.
मुलीचे आईवडील कामावरून घरी परतल्यानंतर मुलगी घरी नव्हती. त्यांनी तिचा सर्वत्र शोध घेतला. काही वेळाने जवळ असलेल्या एका झोपडीत मुलगी जखमी अवस्थेत आढळून आली. मुलीला उपचारासाठी तात्काळ रुग्णालयात दाखल करण्यात आले. या घटनेची माहिती मिळताच सुलतानपूर लोधी पोलीस घटनास्थळी पोहोचले. त्यांनी घटनेची माहिती घेतली.मुलीची प्रकृती गंभीर होती. डॉक्टरांनी तिला अमृतसर येथील मेडिकल कॉलेजमध्ये पुढील उपचारासाठी पाठवले. या घटनेने पीडितेचे आईवडील हादरले आहेत. त्यांना प्रचंड मानसिक धक्का बसला आहे.
मुलीच्या वडिलांनी पोलिसांना दिलेल्या माहितीनुसार, त्यांची आर्थिक परिस्थिती हलाखीची असून ते हुसैनपूरच्या झोपडीत राहतात. मजुरी करून आपल्या कुटुंबाचे पालनपोषण करतात. त्यांना तीन मुली आणि दोन मुले आहेत. त्यांची सर्वात लहान मुलगी सात वर्षांची असून, तिला बिस्किटाचे आमिष दाखवून तिच्यावर बलात्कार करण्यात आला. पोलिसांनी आरोपीला ताब्यात घेतले आहे. त्याच्याविरोधात विविध कलमान्वये गुन्हा दाखल केला आहे. त्याला कोर्टात हजर करून पोलीस कोठडीची मागणी केली जाईल असं पोलिसांनी म्हटलं आहे. एका हिंदी वेबसाईटने याबाबतचे वृत्त दिले आहे.