पहाटे ५.३० ला हॉटेलवरून निघाले, २.३० वाजता राजाचा मृतदेह दरीत फेकला; 'असा' होता ९ तासांचा घटनाक्रम

तिथे सोनमचा इशारा मिळताच विशालने राजाच्या डोक्यावर चाकूने हल्ला केला. त्यानंतर इतर आरोपींसोबत झटापट झाली. त्यात राजाची हत्या करण्यात आली. 

Raja Raghuvanshi Murder Case: मेघालय पोलिसांच्या चौकशीत अखेर सोनम रघुवंशी हिने पती राजाच्या हत्येचा कट रचल्याचा गुन्हा कबूल केला आहे. राजा रघुवंशी हत्या प्रकरणी पोलिसांनी गाजीपूर येथे सरेंडर केलेल्या सोनमला शिलांगला आणले. तिथून या घटनेचा तपास करत वेगवेगळे धागेदोरे उघड केले. त्यानंतर पोलिसांनी या घटनेतील मुख्य आरोपी सोनम रघुवंशी आणि तिचा कथित प्रियकर राज कुशवाह या दोघांना समोरासमोर बसवून चौकशी केली तेव्हा सोनमने तिचा गुन्हा कबूल केला. राजाच्या हत्येचे पूर्ण प्लॅनिंग ९ तासांत केले होते.

त्या गुन्हेगारांची राजासोबत भेट कधी झाली?

२३ मे २०२५ रोजी पहाटे ५.३० वाजता सोनम आणि राजा शिप्रा होम स्टेमधून बाहेर पडले. त्यानंतर अर्ध्या तासांनी दोघे चेरापूंजी फिरण्यासाठी निघाले. सोनमचे ३ साथीदार त्यांनीही त्याचवेळी हॉटेलमधून चेक आऊट केले. सकाळी १० च्या सुमारास दोघे ट्रेक करत २००० हजार पायऱ्या चढले तेव्हा आनंद, आकाश आणि विशाल या आरोपींसोबत राजाची भेट झाली. याचवेळी त्या ५ जणांना गाईडने पाहिले होते. ज्या गाईडच्या जबाबामुळे बेपत्ता प्रकरण सोडवण्यात पोलिसांना मदत मिळाली. 

जसजसे हल्लेखोर आणि राजा यांच्यात बोलणे सुरू झाले तसे सोनम त्यांच्यामागून चालत होती. दुपारी १२.३० च्या सुमारास सोनमने राजाची आई उमा रघुवंशी यांना फोन केला आणि बोलण्यात चालून चालून पाय थकल्याचे सांगितले. त्याचवेळी आईने राजाशी केलेले बोलणे अखेरचे ठरले. दुपारी १ ते १.३० च्या दरम्यान हे लोक एका पार्किंग जवळ पोहचले. तिथे सोनमचा इशारा मिळताच विशालने राजाच्या डोक्यावर चाकूने हल्ला केला. त्यानंतर इतर आरोपींसोबत झटापट झाली. त्यात राजाची हत्या करण्यात आली. 

राजाचा मृतदेह २.३० वाजता फेकला

पतीच्या हत्येनंतर २.१५ मिनिटांनी सोनमने तिच्या फोनवरून सात जन्मों का साथ है असं म्हणत एक पोस्ट केली. त्यानंतर आरोपींनी २ वाजून ३० मिनिटांनी राजाचा मृतदेह पार्किंगजवळील दरीत फेकून दिला. सोनम आणि राजाचे लग्न ११ मे रोजी झाले होते. लग्नानंतर लगेच राजाचा काटा काढण्याचे प्लॅनिंग सुरू झाले होते. हा प्लॅन इतर कुणी नाही तर त्याची पत्नी सोनमने राज कुशवाहसोबत मिळून बनवला होता असं पोलिसांनी सांगितले.

दरम्यान, इंदूरमध्ये लग्नानंतर सोनम आणि राजा हनीमूनसाठी मेघालयला गेले होते. तिथे २३ मे रोजी नोंगरियाट गावातील होम स्टेमधून चेक आऊट केल्यापासून काही तासांत ते दोघे बेपत्ता झाले. ही जागा त्या जागेपासून २० किमी दूर आहे जिथे २ जून रोजी राजाचा मृतदेह सापडला होता. सोनमने राजाची हत्या करण्यासाठी आरोपींना २० लाख रुपये दिले होते.