कल्याण - सध्या पब्जी या ऑनलाईन गेमच्या व्यसन बऱ्याच तरुणांमध्ये आहेत. कल्याणमध्ये पब्जीचे व्यसन असलेल्या तरुणाने मोबाईलचे चार्जर मिळत नसल्याने बहिणीच्या होणाऱ्या नवऱ्याला चाकूने भोसकल्याची धक्कादायक घटना समोर आली आहे. रजनीश राजभर (27) असे हल्लेखोर तरुणाचे नाव असून त्याने केलेल्या हल्ल्यात ओम भवडनाकर (32) जखमी झाले आहेत. रजनीशला पब्जी खेळण्याचे व्यसन होते. 7 फेब्रुवारीला दुपारी रजनीश पब्जी खेळत असताना त्याच्या मोबाईलची बॅटरी उतरली. तो फोन चार्जिंगला लावायला गेला असता त्याला चार्जरची केबल कापलेली असल्याचे दिसले. त्यामुळे तो फोन चार्ज करू शकत नव्हता. त्यावेळी त्याची बहिणी व तिचा होणारा नवरा ओम हे घरात होते. रजनीशने चार्जरविषयी बहिणीकडे विचारणा केली व तिनेच चार्जरची वायर कापल्याचा आरोप त्याने तिच्यावर केला. परंतु आपल्याला याबाबत काहीच माहीत नसल्याचे तिने सांगितले. त्यानंतर रागाच्या भरात रजनीशने बहिणीच्या लॅपटॉपची वायर कापली. त्यावरून त्यांच्यातील वाद पेटला. त्यामुळे ओमने मध्यस्थी करण्याचा प्रयत्न केला. मात्र, संतापलेला रजनीश शांत होत नसल्याने ओमने त्याला पब्जीच्या व्यसनावरून हटकले. त्यावरून रजनीश आणखीनच भडकला व त्याने ओमच्या पोटात सुरा खुपसला. त्यानंतर ओमला ताबडतोब रुग्णालयात दाखल केले. तेथे उपचारानंतर ओमला डिस्चार्ज मिळाला असून याप्रकरणी त्याने कोळसेवाडी पोलीस ठाण्यात तक्रार दाखल केली आहे. पोलिसांनी याप्रकरणी रजनीश विरोधात मारहाणीचा गुन्हा दाखल केला आहे.
पब्जी गेमच्या व्यसनापायी बहिणीच्या होणाऱ्या नवऱ्याला भोसकले
By ऑनलाइन लोकमत | Updated: February 15, 2019 23:06 IST