मालेगाव (वाशिम) - ट्रकने दिलेल्या जबर धडकेत आॅटोमधील मनोज परसराम शिंदे (३५) रा. वाशिम हे जागीच ठार झाल्याची घटना मालेगाव ते वाशिम मार्गावरील एका हॉटेलनजीक ५ सप्टेंबरच्या रात्रीदरम्यान घडली. ६ सप्टेंबरला मृतकाच्या भावाने फिर्याद दिल्याने मालेगाव पोलिसांनी ट्रकचालकाविरूद्ध गुन्हा दाखल करण्यात आला.
मृतकाचे भाऊ विनोद परसराम शिंदे (वय ४५) रा. वाशिम यांनी मालेगाव पोलीस स्टेशनला फिर्याद दिली की, त्यांचे भाऊ मनोज शिंदे हे ५ सप्टेंबरच्या रात्रीदरम्यान एमएच ३७ जी ७२५ क्रमांकाच्या आॅटोने वाशिमला येत होते. मालेगाव शहरापासून जवळच असलेल्या एका हॉटेलजवळ आरजे ९८ जीसी १४३१ क्रमांकाच्या ट्रक चालकाने सदर आॅटोला जबर धडक दिली. यामध्ये आॅटोमध्ये असलेले मनोज शिंदे जागीच ठार झाले. ट्रक चालकाने भरधाव व निष्काळजी वाहन चालविल्याने हा अपघात झाल्याचे तक्रारीत नमूद आहे. याप्रकरणी मालेगाव पोलिसांनी ट्रक चालकाविरूद्ध गुन्हा दाखल केला. पुढील तपास पोलीस कर्मचारी बियाणी हे करीत आहेत.