खळबळजनक! ३० वर्षांपासून भारतात राहत होत्या पाकिस्तानी माय-लेकी; 'असा' झाला पर्दाफाश

उत्तर प्रदेशच्या मेरठ येथील जली कोठी परिसरातील नादिर अली बिल्डिंगमध्ये एक महिला आणि तिची मुलगी नागरिकत्व नसतानाही गेल्या तीन दशकांपासून भारतात राहत आहेत. एका महिलेने या दोघांविरुद्ध एसएसपी (SSP) आणि एसपी सिटी (SP City) यांच्याकडे तक्रार केल्यानंतर या प्रकरणी गुन्हा दाखल करण्यात आला आहे. तक्रारदार महिलेने या दोघांवर हेरगिरी करण्याचा आणि गोपनीय माहिती पोहोचवल्याचा गंभीर आरोप केला आहे. 

मेरठच्या दिल्ली गेट कोठी येथील रहिवासी रुखसाना यांनी तक्रार केली की, जली कोठीच्या नादिर अली बिल्डिंगमध्ये राहणाऱ्या फरहत मसूद यांनी १९८८ मध्ये पाकिस्तानात जाऊन सबा ऊर्फ नाझी या पाकिस्तानी तरुणीशी लग्न केलं होतं. या दोघांना तीन मुलं झाली. १९९३ मध्ये सबा पाकिस्तानात गेली होती, तिथे तिने मे १९९३ मध्ये चौथ्या मुलीला, एनम फरहतला जन्म दिला. परतताना तिने आपल्या पाकिस्तानी पासपोर्टवर एनमची नोंद केली आणि त्या भारतात परतल्या.

येथे आल्यावर एनमचा कॅन्टोन्मेंटमधील एका नामांकित शाळेत प्रवेश घेण्यात आला, मात्र तिला भारतीय नागरिकत्व मिळालं नाही. सबा आणि एनम आजपर्यंत पाकिस्तानी नागरिकच आहेत. सबाने बनावट कागदपत्रं तयार करून एनमचा बनावट पासपोर्ट बनवून घेतल्याचा आरोप आहे. इतकंच नाही तर सबाने मतदार यादीतही दोन ठिकाणी आपली नावं नोंदवून घेतली आहेत.

बनावट पासपोर्टच्या आधारे या माय-लेकी अनेकदा परदेशात जाऊन आल्याचाही आरोप आहे. रुखसाना यांनी असाही आरोप केला आहे की, सबाचे पाकिस्तानी वडील हनीफ हे आयएसआय (ISI) एजंट आहेत. त्यांनी सबा आणि एनम यांच्याकडून हेरगिरी करून घेतल्याचा आणि 'स्लीपर सेल' तयार केल्याचा दावा केला आहे. या दोघी सैन्य क्षेत्रात आणि दिल्लीतील मंत्रालयांमध्ये फिरून आयएसआयसाठी माहिती गोळा करतात, असा आरोपही तक्रारीत करण्यात आला आहे.

रुखसाना यांनी सांगितलं की, त्यांनी या संपूर्ण प्रकरणाची तक्रार वरिष्ठ पोलीस अधिकाऱ्यांकडे केली होती. आता या प्रकरणी गुन्हा दाखल झाला असून एका महिलेच्या तक्रारीवरून एसपी सिटींमार्फत तपास करण्यात आल्याचं पोलिसांनी सांगितलं. त्या आधारावरच दिल्ली गेट पोलीस ठाण्यात एफआयआर (FIR) नोंदवण्यात आला आहे. या प्रकरणाचा सखोल तपास सुरू असून पुराव्यांच्या आधारे आरोपींवर कठोर कारवाई केली जाईल.