प्रेमात आंधळी झाली ममता! प्रियकरासाठी पोटच्या २ वर्षांच्या मुलीचा गळा घोटला; मृतदेह गटारात फेकून रचला बनाव

आग्र्यातील छत्ता भागात एका आईने आपल्या २ वर्षांच्या मुलीची हत्या करून मृतदेह गटारात फेकला.

आईच्या प्रेमाला आणि ममता या शब्दाला काळिमा फासणारी एक अत्यंत भयानक घटना आग्र्यातील छत्ता परिसरातून समोर आली आहे. एका महिलेने आपल्या अवघ्या २ वर्षांच्या चिमुरडीची निर्घृण हत्या करून तिचा मृतदेह गटारात फेकून दिला. अनैतिक संबंधांमध्ये अडथळा ठरत असल्यामुळे या क्रूर मातेने आपल्याच काळजाच्या तुकड्याचा बळी घेतल्याचा खळबळजनक आरोप मुलीच्या वडिलांनी केला आहे. याप्रकरणी पोलिसांनी आरोपी महिलेला बेड्या ठोकल्या आहेत.

गटारात तरंगताना आढळला चिमुरडीचा मृतदेह

यमुना किनारा मार्गावरील लड्डू गोपाल प्रतिमा आणि यमुना आरती स्थळाच्या दरम्यान असलेल्या एका अरुंद गटारात मंगळवारी संध्याकाळी ७ च्या सुमारास २ वर्षीय खुशीचा मृतदेह आढळला. पाईपलाईनच्या बाजूला पाणी साचल्याने सुरुवातीला हा मृतदेह कोणाच्याही नजरेस पडला नाही. मात्र, माहिती मिळताच पोलिसांनी घटनास्थळी धाव घेत मृतदेह ताब्यात घेतला आणि ओळख पटवण्याचे काम सुरू केले.

डॉक्टरकडे जाते सांगून निघाली अन्...

मृत खुशीचे वडील रामू धाकड यांनी दिलेली माहिती अंगावर शहारे आणणारी आहे. नोव्हेंबर २०२३ मध्ये रामू यांचा विवाह बिहारच्या ममताशी झाला होता. मंगळवारी सकाळी ११ वाजता ममता "लेकीला डॉक्टरकडे घेऊन जाते" असे सांगून घरून पडली ती परतलीच नाही. जेव्हा बराच वेळ झाला तरी ती आली नाही, तेव्हा रामू यांनी पोलीस ठाण्यात धाव घेतली. रात्री उशिरा पोलिसांनी जेव्हा खुशीचा फोटो दाखवला, तेव्हा बापाच्या पायाखालची जमीनच सरकली.

अनैतिक संबंधांतून लेकीची हत्या?

रामू यांनी पत्नी ममतावर अत्यंत गंभीर आरोप केले आहेत. ममताचे एका तरुणासोबत प्रेमसंबंध होते, असा दावा त्यांनी केला आहे. ती तासन् तास फोनवर बोलायची आणि याआधीही अनेकदा कोणालाही न सांगता घरातून निघून गेली होती. आपल्या प्रियकरासोबत राहण्यासाठी तिने निष्पाप खुशीला वाटेतून बाजूला केले आणि तिची हत्या केली, असा संताप वडिलांनी व्यक्त केला आहे.

पोलीस तपासात काय समोर आले?

एसीपी शेषमणी उपाध्याय यांनी सांगितले की, प्राथमिक तपासणीत मुलीच्या शरीरावर जखमेच्या कोणत्याही खुणा आढळलेल्या नाहीत. तिचा मृत्यू गळा दाबल्याने झाला की पाण्यात बुडवून, हे शवविच्छेदन अहवालानंतरच स्पष्ट होईल. पोलिसांनी आरोपी आईला ताब्यात घेतले असून ती वारंवार आपली विधाने बदलत आहे.