शिवशाही बसमधून तब्बल दोन कोटींचे दागिने पळविले

किरणकुमार पुरोहित (वय ४४, रा. भाईंदर पूर्व) यांचा सोने चांदी बनविण्याचा व्यवसाय आहे.

कसारा : सोन्याचा व्यापार उरकून संगमनेरमार्गे मुंबईनाका नाशिकहून मुंबईच्या दिशेने परिवहन महामंडळाच्या शिवशाही बसने निघालेले व्यापारी किरणकुमार धनराज पुरोहित यांच्याजवळील १ कोटी ६८ लाख रुपयांचे सोन्या-चांदीचे दागिने आणि २ लाख रोख रकमेवर चौघा अज्ञातांनी डल्ला मारला. ही घटना शुक्रवारी मध्यरात्री मुंबई-नाशिक महामार्गाच्या उंबरमाळी गावहद्दीतील हॉटेल फेमस येथे उघडकीस आली.

किरणकुमार पुरोहित (वय ४४, रा. भाईंदर पूर्व) यांचा सोने चांदी बनविण्याचा व्यवसाय आहे. विविध शहरांतील ज्वेलर्स दुकानदारांना सोन्या-चांदीच्या दागिन्यांची ते विक्री करतात. शुक्रवारी श्रीरामपूर, लोणी, कोपरगाव, राहाता आणि संगमनेर या शहरांत जाऊन पुरोहित यांनी मंगळसूत्र आणि विविध प्रकारच्या छोट्या दागिन्यांची विक्री केली. त्यानंतर उरलेले सोन्या-चांदीचे दागिने आणि व्यापारातून मिळालेली रोख रक्कम बॅगेत घेऊन ते परतीच्या प्रवासाला निघाले होते.

रात्री १२ वाजता नाशिक-बोरिवली शिवशाही बसने प्रवास सुरू केल्यानंतर रात्री १:३० वाजता बस उंबरमाळी गावहद्दीतील मुंबई-नाशिक महामार्गावर हॉटेल फेमस येथे थांबविण्यात आली होती. पुरोहित त्यांच्याजवळील सोन्याचांदीची बॅग आसनावर ठेवून पाण्याची बॉटल घेण्यासाठी खाली उतरले.  त्या दरम्यान प्रवासात असलेल्या अज्ञात चौघांनी बॅग लंपास करून कारमधून मुंबईच्या दिशेने पोबारा केल्याचा प्रकार बस कंडक्टर यांच्या सांगण्यातून पुरोहित यांच्या लक्षात आला. त्यानंतर बसचालकाने कारचा पाठलाग करण्याचा प्रयत्न केला. मात्र, कार रस्त्यावर दिसून आली नाही. 

सोन्या-चांदीचे दागिने चोरीला गेल्याने पुरोहित यांना धक्का बसला आहे. त्यांनी कसारा पोलिस ठाणे गाठून घडलेल्या प्रकारचा जबाब नोंदवून अज्ञातांविरोधात गुन्हा दाखल केला आहे. या घटनेचा तपास पोलिस निरीक्षक सुरेश गावित करीत आहेत. या घटनेमुळे खळबळ उडाली होती