बहराइच – पत्नी आणि मुलाचा विरह सहन न झाल्यानं एका युवकाने आत्महत्येसारखं टोकाचं पाऊल उचललं आहे. खोलीत पंख्याला लटकून त्याने जीव दिला. सुसाईड करण्यापूर्वी युवकाने पत्नीकडून होणारा मानसिक छळ मोबाईल कॅमेऱ्यात रेकॉर्ड केला. त्यानंतर गळफास घेऊन आत्महत्या केली. स्थानिकांकडून पोलिसांना या घटनेची माहिती मिळाल्यानंतर तात्काळ पोलीस तिथे पोहचले आणि मृतदेह ताब्यात घेतला.
बहराइच जिल्ह्यातील कोतवाली पोलीस ठाण्याच्या हद्दीत ही घटना घडली. ३० वर्षीय इमरानने २५-२६ ऑक्टोबरच्या रात्री रुममध्ये पत्नीकडून झालेल्या मानसिक छळाबाबत धाय मोकलून रडत व्यथा मांडली. हा सर्व व्हिडीओ त्याने मोबाईलमध्ये रेकॉर्ड केला. त्यानंतर त्याच खोलीत पंख्याला लटकून त्याने गळफास घेत आत्महत्या केली. मृत इमराननं व्हिडीओत म्हटलं की, नाजिया तु खूप चूक केली. मला माझ्या मुलापासून दुरावून सर्व नातं संपवून चुकीचं वागली. आज मी कुठेच राहिलो नाही. मी आईवडिलांची साथ सोडून तुझा हात पकडला होता असं त्याने सांगितले.
त्यानंतर तू माझी साथ सोडून गेलीस. आता जगायची इच्छा नाही. मी मरत आहे. शपथ, मी तुझ्यावर इतकं प्रेम नाही करत जितकं मी माझ्या मुलावर प्रेम करतो. मी जे काही केले माझ्या मुलासाठी केले. तू मुलाला घेऊन निघून गेली. मुलाला परत माझ्याकडे पाठवणार नाही हे मला माहिती आहे. तू चांगलं नाही केलं. तुला माहिती आहे मी मुलाशिवाय जगू शकत नाही. मी व्हिडीओ बनवतोय. माझ्या मृत्यूला नाजिया माझी पत्नी जबाबदार आहे. माझी सासू जबाबदार आहे. जी समजू शकली नाही की इमरान नाजिया आणि मुलाशिवाय राहू शकत नाही. मी गळफास घेतोय. त्याला जबाबदार नाजिया आहे असंही त्याने व्हिडीओत म्हटलं आहे.
काय आहे प्रकरण?
निवृत्त दिवान महबूब आलम यांचा मुलगा इमरान बशीरगंज परिसरात पत्नी नाजिया आणि मुलासह राहत होता. मागील काही दिवसांपासून पती इमरान याच्याशी वाद घालत नाजिया माहेरी निघून गेली होती. परंतु इमरान याचं त्याच्या मुलावर खूप प्रेम होते. त्याने नाजियाच्या माहेरी जाऊन जबरदस्तीनं मुलाला घेऊन आला. ज्यामुळे दोघांमध्ये प्रचंड वाद झाला. नाजिया मुलाला घेऊन माहेरी गेल्यानं इमरानला पत्नी-मुलाचा विरह सहन झाला नाही. त्याने घरातच गळफास घेऊन आत्महत्या केली. मृत इमरानच्या वडिलांनी पोलीस ठाण्यात दिलेल्या तक्रारीवरुन पुढील तपास सुरु आहे.