त्र्यंबकेश्वर फिरविण्याच्या बहाणा; गुंगीचे औषध पाजून अल्पवयीन मुलीवर शारिरिक अत्याचार

पोलिसांनी संशयित रोहितविरुध्द बलात्कार, बालकांचे लैंगिक अपराधापासून संरक्षण (पोस्को) अधिनियमानुसार गुन्हा दाखल करुन अटक केली आहे

ठळक मुद्देसंशयित रोहितविरुध्द बलात्कार, पोस्कोनुसार गुन्हा

नाशिक : शहरापासून अवघ्या २८ किलोमीटर अंतरावरील त्र्यंबकेश्वर येथे फिरण्याचा बहाणा करत एका वासनांध संशयित तरुणाने अल्पवयीन मुलीला पंचवटीतून दुचाकीवर बसवून नेले. तेथील एका लॉजवर शीतपेयातून गुंगीचे औषध देत तिच्यासोबत शरीरसंबंध प्रस्थापित करत अत्याचार केल्याची धक्कादायक घटना उघडकीस आली आहे.

त्र्यंबकेश्वर परिसरात तीन दिवसांपासून जोरदार पावसाला सुरुवात झाली आहे. येथील निसर्गसौंदर्य बहरले आहे. पोलिसांनी या भागातील पर्यटनकेंद्रांवर येण्यास पर्यटकांना मज्जाव घातला आहे. वीकेण्डला या भागात पोलिसांचा मोठा फौजफाटा तैनात असल्याचे चित्र पहावयास मिळाले. यामुळे बहुतांश पर्यटकांना पोलिसांकडून माघारी धाडले जात होते. पोलिसांची नजर चुकवित पंचवटी भागातील संशयित रोहित आनंद म्हसदे (२५,रा.फुलेनगर, पंचवटी) हा एका अल्पवयीन मुलीला फुस लावून त्र्यंबकेश्वरला फिरुन येण्याच्या बहाण्याने घेऊन गेला.

फिर्यादी पिडित अल्पवयीन मुलगी आणि संशयित रोहित हा एकाच ठिकाणी कामाला असल्याने ते एकमेकांच्या परिचित असल्याचे पोलिसांनी सांगितले. रोहित याने त्र्यंबकेश्वरमध्ये पोहचल्यानंतर येथील एका हॉटेलवजा लॉजमध्ये अल्पवयीन मुलीला घेऊन जात तिला शितपेय पाजण्याचा बनाव करत त्यामध्ये गुंगीचे औषध टाकून तिच्याशी बळजबरीने शरीरसंबंध प्रस्थापित केल्याचे फिर्यादीत म्हटले आहे. पोलिसांनी संशयित रोहितविरुध्द बलात्कार, बालकांचे लैंगिक अपराधापासून संरक्षण (पोस्को) अधिनियमानुसार गुन्हा दाखल करुन अटक केली आहे. याप्रकरणी पुढील तपास महिला उपनिरिक्षक डी.एस.पाटील या करीत आहेत.